Српскиот фонд за пензиско и инвалидско осигурување (ПИО) планира да имплементира вештачка интелигенција во процесот на масовна обработка на документи и други дејности. Оваа иновација се очекува да им овозможи на корисниците и вработените во Фондот побрз пристап до потребните информации, како и намалување на административните процедури.
Фондот распиша тендер за воведување на систем базиран на вештачка интелигенција, а предвидената вредност на оваа инвестиција изнесува 800 милиони динари (6,8 милиони евра).
Според документите од јавната набавка, покрај забрзаниот пристап и поедноставувањето на администрацијата, оваа апликација треба да обезбеди персонализирани услуги, зголемена сигурност на податоците, транспарентност во работењето на институцијата, постојана достапност за корисниците и полесна комуникација.
Од Фондот ПИО истакнуваат дека располагаат со огромна количина документи и податоци, а нивната несистематска обработка може да предизвика задоцнувања, несигурност и грешки кои би можеле да влијаат врз квалитетот на одлуките.
„Современите решенија овозможуваат забрзување на овој процес и негово попрецизно работење, а самите службеници се ослободуваат од рутинска работа и се насочуваат кон активности што бараат стручна проценка“, се наведува во тендерската документација.
Овој „екосистем на апликации“ ќе служи за поддршка на корисниците, анализа на документација и интегрирање на финансиски податоци, користејќи ги можностите на вештачката интелигенција.
Системот ќе функционира во два режима. Во првиот, јавен режим, сите овластени посетители на порталот ќе имаат пристап до официјални информации, упатства и навигација до релевантни страници и формулари. Во вториот, персонализиран режим, регистрираните корисници преку порталот за е-влада ќе добиваат информации прилагодени на нивните потреби. Целта на ова решение е да се намали притисокот врз контакт центрите и шалтерските служби, како и да се обезбеди еднаква достапност до услугите за сите граѓани, во секое време.
Втората апликација која ќе биде воведена од фондот ПИО ќе биде наменета за масовна обработка на документација со примена на вештачка интелигенција.
Рокот за доставување понуди е 13 октомври годинава, а времетраењето на договорот е 12 месеци.
зш/
