Table of Contents
Роки Канака обожава животни, а неговите совети на Инстаграм ги следат речиси 600 илјади луѓе
Познатиот експерт за кучиња, Роки Канака, има повеќе од 20 години искуство со овие животни – ги истражува, ги проучува, а неговата љубов кон нив е неизмерна. Има огромно знаење за речиси сите раси, па неговите насоки ги слушаат илјадници луѓе ширум светот.
Имено, Роки е страстен заговорник за спасување домашни миленици и нивно вдомување. Роки го познава карактерот на кучињата до срж, па многумина се изненадија кога истакна дека никогаш не би ги купил следниве 3 раси: германски овчар, кане корсо и хаска.
Но неговата одлука не се заснова на недостатоците на овие раси, напротив – тој им се восхитува на овие кучиња и ги почитува. Неговиот став, всушност, е повик за акција и апел до луѓето дека ако сакаат да чуваат некоја од овие три раси, би требало да ги посвојат од прифатилиште или од улица, бидејќи токму овие три раси на кучиња се најзастапени во азилите ширум светот.
1. Кане корсо
Оваа убава, голема италијанска раса на кучиња е позната по својата заштитничка природа и последниве години станува сè попопуларна. Нивната мускулеста градба и фокусиран поглед можат да бидат застрашувачки, но тие се нежни џинови под грубата површина и многу им се лојални на своите семејства. За жал, нивната големина и сила, во комбинација со неинформираните сопственици кои не ги разбираат нивните потреби, довеле до тоа што многу од овие величествени песови се напуштени или оставени во засолниште.
Поврзани објави
2. Хаска
Со својот изглед кој потсетува на волк и со продорните сини очи, хаските освојуваат со својата убавина на прв поглед. Тие првично биле одгледувани за да можат да влечат лесни товари на поголеми растојанија во студени климатски услови, па не е ни чудно што се полни со енергија и многу разиграни, како и што тешко поднесуваат жештина. Меѓутоа, фактот што имаат многу високо ниво на енергија и тенденција често да се огласуваат и да испуштаат гласни звуци, значи дека не се соодветни за секого и дека многумина, за жал, ги напуштаат овие кучиња. Луѓето често купуваат хаски импулсивно, а кога ќе сфатат дека не можат да одговорат на нивните потреби, безмилосно ги напуштаат.
3. Германски овчар
Германските овчари се познати по својата интелигенција, лојалност и сестраност. Во минатото биле користени за сточарство, но оттогаш станале бесценети членови на полициските единици, тимовите за потраги и спасување и чувари на домаќинството. Нивниот впечатлив достоинствен изглед и непоколебливата лојалност привлекуваат многу семејства, но нивната популарност е меч со две сечила. Многу луѓе ширум светот ги одгледуваат и ги продаваат, но голем број од нив остануваат без домови и завршуваат на улица или во засолниште, бидејќи не може секој лесно да се справи со оваа голема раса која бара многу активност и изразен авторитет.
