Дали сте слушнале за синхронизација на циклуси? Врската помеѓу исхраната и менструалното здравје и како тие да се координираат за да се ублажат симптомите на ПМС стана тренд тема во интернет заедницата.
Дури и научните истражувања потврдија дека постои корелација помеѓу исхраната и менструалниот циклус на жената. Жените со менструални нарушувања имаат помал внес на протеини, витамин К, витамин Б3, витамин Б5 и натриум во споредба со другите жени. Едноставно кажано: тие консумираат повеќе храна и пијалоци со висока содржина на шеќер и имаат недоволен внес на хранливи материи. Па, како ова знаење може да ни помогне кога се приближува менструацијата?
Како храната влијае на менструалниот циклус?
Замислете го вашето тело како комплексен екосистем, во кој хормоните играат улога на чувар на рамнотежа. Тие ве водат во текот на целиот 28-дневен циклус. Но, тие се исто така под нечија контрола. Хормоните се целосно зависни од важните хранливи материи што ги внесуваме преку нашата исхрана. Хранливите материи што ги внесуваме играат клучна улога во производството, регулирањето и метаболизмот на хормоните. На пример, омега-3 масните киселини што се наоѓаат во рибата и лененото семе можат да помогнат во намалувањето на воспалението, потенцијално ублажувајќи ја менструалната болка. Во исто време, храната богата со железо, како што се зелениот лиснат зеленчук и посното месо, го надополнуваат железото изгубено за време на менструацијата, помагајќи во борбата против заморот и одржувањето на нивото на енергија. Но, приказната за влијанието на исхраната врз менструалниот циклус не треба да се сведува само на додавање на одредени видови храна во исхраната, целта е да се создаде хармоничен нутритивен баланс. Исхраната богата со преработена храна, шеќер и нездрави масти може да го наруши хормоналниот баланс, што доведува до нередовни циклуси, потешки симптоми на ПМС, па дури и зголемено крварење.
Што треба да јадете за да ги ублажите менструалните проблеми?
Целата уметност на синхронизирање на циклусот лежи во прилагодувањето на вашата исхрана точно на фазата од менструалниот циклус во која се наоѓате моментално. Ако вашата цел е да го ублажите менструалните проблеми, клучот е магнезиумот. Овој минерал делува како смирувачки балсам за матката, помага во опуштање на мускулите и може да ги намали грчевите. Можете да го најдете во храна како темно чоколадо, бадеми и спанаќ. Значи, следниот пат кога ќе посегнете по чоколадо за време на менструацијата, направете го тоа без грижа на совеста!
Следен на листата е витаминот Д, чие ниво е директно поврзано со редовните циклуси и ублажените ПМС симптоми. Иако сончевата светлина е одличен извор на витамин Д, малку е веројатно дека ќе го внесете доволно на тој начин. Мора да јадете мрсна риба, жолчки од јајца и збогатена храна. Не смееме да заборавиме на влакната – уште еден тивок херој, овој пат за варење, но и за хормонална рамнотежа. Исхраната богата со растителни влакна може да помогне во отстранувањето на вишокот естроген од телото, потенцијално намалувајќи го ризикот од состојби како што се ендометриоза и фиброиди. Покрај тоа, влакната го подобруваат варењето на храната, што може да помогне во ублажување на надуеноста и менструалните непријатности. Јадете малини, наут, леќа, овес, ‘рж.
Храна што треба да се избегнува за време на ПМС и менструација
Доколку веќе сте одлучиле да ја корегирате вашата исхрана и лично да ги проверите најновите трендови за велнес, тогаш следете ја листата на храна што не се препорачува во текот на првите денови од циклусот. Солената и храната богата со натриум може да предизвика задржување на течности, оток и дополнителна надуеност, но, од друга страна, премногу шеќер може да доведе до ненадејни флуктуации на инсулинот и промени во расположението. Кофеинот може да предизвика задржување на течности и главоболки, но не го исклучувајте целосно кафето на првиот ден од менструацијата бидејќи може да добиете главоболка од недостаток на кофеин. Затоа, држете се до две шолји кафе на ден. Избегнувајте алкохол, бидејќи го суши телото и може да ги зголеми главоболките и чувството на надуеност. Зачинетата храна не влијае директно на матката, но може да го иритира желудникот и да предизвика чувство на печење, гадење или дијареја. Црвеното месо, како што се говедското и свинското месо, иако е богато со железо, кое ви е потребно во овој период, содржи и високо ниво на простагландини, соединенија кои ги стимулираат контракциите на матката и можат да ги зголемат грчевите. Затоа, пронајдете алтернативни извори на железо во овој период.
Поврзани објави
Виралното лате со боровинки кое го ублажува ПМС-от
Уметноста на синхронизирање на циклусот ни донесе вкусни рецепти кои ги ублажуваат тегобите во секоја фаза од циклусот. Ова лате со боровинки е идеално за последните денови пред крварење и за самата менструација.
Фото: Pexels.com
