Екстремните горештини и огромната потрошувачка на струја предизвикаа силен ценовен удар на електроенергетските берзи во Југоисточна Европа. Во најкритичните часови цената на електричната енергија надмина 500 евра за мегават-час.
Најголем притисок врз системите создава масовното користење климатизери, додека сушата и ниските водостоји дополнително го ограничуваат производството од хидроелектраните.
Во Грција, Бугарија, Унгарија и Србија, берзанските цени од вообичаените 80–100 евра за кратко време се искачија над 300 евра, а во одредени периоди надминаа и 400 евра за мегават-час.
Најскапо е во часовите кога потрошувачката го достигнува дневниот максимум, токму кога климатизацијата најмногу ги оптоварува електроенергетските системи.
Експертите предупредуваат дека ваквите ситуации ја покажуваат потребата од нови инвестиции во обновливи извори, но и во батериски системи и други капацитети за складирање, кои би помогнале да се намали зависноста од скапата струја во периодите на најголема потрошувачка.
