Министрите за животна средина на ЕУ се согласија за преговарачката позиција на блокот пред климатскиот самит на Обединетите нации COP 29 во Азербејџан следниот месец, се вели во соопштението на Советот, пренесува Ројтерс.
Преговарачите ќе се состанат во Баку од 11 до 22 ноември за да разговараат за новата цел за финансирање на активностите за сузбивање на последиците од климатските промени, што ќе ја замени сегашната посветеност на богатите нации да обезбедуваат 100 милијарди долари годишно за земјите во развој. Министрите се состанаа во понеделникот во Луксембург за да ја изнесат конечната верзија на нивниот став, пренесува Катимерини.
Ранливите земји и земјите во развој сакаат далеку поголема цел за финансирање, но ЕУ и Канада рекоа дека големиот скок во јавното финансирање е „нереален“. Советот во своето соопштение подвлече дека „приватните инвестиции ќе треба да обезбедат најголем дел од потребната инвестиција во зелената транзиција“.
Главниот преговарач на претседателството COP29 во понеделникот рече дека обемот на потребата е во трилиони долари, но реалната цел на јавниот сектор е во „стотици милијарди“. ЕУ претходно ја повика Кина, втората по големина економија во светот, да учествува во финансискиот план за климата, но Кина сè уште се смета за земја во развој според параметрите на ОН.
