Во емотивното гостување кај Лазаров, Драган Величковски – Тајзи, откри досега непознат период од својот живот и раскажа како Марко Маринковиќ – Слаткар му помогнал да не се откаже од музиката.
Драган Величковски, познат како Тајзи, во гостувањето во подкастот на Лазаров откри дел од својата животна приказна за кој досега поретко зборувал јавно. Музичарот раскажа дека во еден особено тежок период се соочил со сериозни семејни проблеми. Неговата мајка се разболела од тумор на главата, додека неговиот татко во истиот период бил во притвор.
Покрај грижата за семејството, Тајзи тогаш се соочувал и со неизвесност околу својата музичка иднина. Како што раскажа, бил разочаран од случувањата околу него и сериозно размислувал да ја напушти Македонија.
Јас во еден период се соочувам со една друга животна ситуација. Мајка ми се разболува од тумор на глава, а татко ми во тој момент беше во притвор. Јас бев многу разочаран од државава и од сè што се случува околу мене“, раскажа Тајзи.
Во тој период тој веќе го имал подготвено материјалот за албумот „Нешто поинакво“, со демо-снимки од песните, но не бил сигурен дали ќе може финансиски и животно да продолжи со музиката. Тогаш разговарал со Марко Маринковиќ – Слаткар, кому му го претставил целиот албум. Како што раскажува Тајзи, средбата на терасата во домот на Слаткар била пресвртна за неговата одлука.
Му го испеав целиот албум и ми кажа: „Ти нигде нема да идеш, ќе правиш музика, ќе бидеме тука кај што ќе бидеме“, раскажа тој.
Но, поддршката, според неговото сведоштво, не завршила само со охрабрувачки зборови. Тајзи вели дека Слаткар му предложил да разговараат за договор со „Иноватива“ и заедно да работат на развивањето на неговата кариера.
Те молам да разговараме за договор и да потпишеме со Иноватива и да градиме заедно кариери“, се присети Тајзи на неговите зборови.
„Одеше со мене кај секој продуцент“
Тајзи во разговорот не ја нагласил само поддршката што ја добил во моментот кога сакал да замине, туку и конкретната помош во почетоците на неговата кариера. Според неговото сведоштво, Слаткар одел со него кај различни продуценти за да го претстави неговиот музички материјал и да ги убеди да работат со него.
Одеше со мене кај секој продуцент, да го убеди дека треба да ми прави песни“, раскажа Тајзи.
Тој додава дека иако веќе имал напишани и снимено демо-верзии од песните, за нивната конечна реализација биле потребни аранжмани и дополнителна продукција.
Поврзани објави
Подоцна, според Тајзи, следувала и исклучително активна концертна година.
Првата година имав не знам колку настапи низ земјава и голем удел во мојата кариера има и би му кажал големо фала на Марко Слаткар“, вели музичарот.
За него, целата приказна е пример за тоа колку може да значи подадената рака од колега во вистински момент.
Животот му даде, не само зашто на мене ми помогнал, туку бидејќи беше многу несебичен. Многу ретко кај нас да сретнеш луѓе што се несебични и што ќе ти помогнат“, рече Тајзи.
На крајот, тој ја опиша нивната соработка како период во кој целта не била само индивидуален успех.
Несебично ми даде дел од себе, нејќеше да се мери со ништо, туку сакаше сите да раснеме“, порача Тајзи.
Одлуката што тогаш ја донел, како што раскажа, значела продолжување на музичкиот пат во момент кога приватниот живот му бил исполнет со неизвесност. Денес, тој период го памети и како момент во кој една реченица од близок колега му помогнала повторно да поверува дека вреди да остане и да продолжи да создава.
Видео: Инстаграм
Фото: приватна архива
