Table of Contents
Ако почнала да бара место покрај радијаторот и да дреме подолго, студот може да има едноставно објаснување – но не секоја промена треба да се игнорира.
Ако со доаѓањето на постудените денови вашата мачка почнала почесто да ја бара најтоплата точка во домот, да се гушка на каучот или да се вовлекува под ќебе, најчесто нема причина веднаш да се загрижите. Промената на времето и намалената активност можат да влијаат врз нејзината дневна рутина.
Мачките и вообичаено спијат многу. Возрасните најчесто поминуваат околу 12 до 16 часа дневно во спиење или дремење, а мачињата и постарите мачки може да одмораат и подолго. Нивниот сон, сепак, не е организиран како човечкиот – тие наизменично спијат и се будат во пократки периоди во текот на денот и ноќта.
Кога времето заладува, активноста опаѓа
Студот, дождот и непријатното време можат особено да влијаат врз мачките кои вообичаено излегуваат надвор. Наместо да ја истражуваат околината, тие почесто остануваат во домот, а помалку движење значи и повеќе време за одмор.
Тоа е дел од нивната природна навика за штедење енергија. Иако домашните мачки не мора да ловат за да стигнат до храната, сè уште имаат дел од однесувањето наследено од своите предци. Најактивни се во периодите околу зори и самрак, додека поголем дел од останатото време го поминуваат во одмор.
Не е случајно што спие токму покрај радијаторот
Кога температурите паѓаат, мачките едноставно почнуваат да бараат потопли места. Затоа во зима почесто може да ги видите на сончев дел од подот, покрај радијатор, под ќебе или прилепени до својот сопственик.
Поврзани објави
Дури и начинот на кој се свиткуваат има своја причина. Кога ќе ги подвиткаат шепите и опашката под телото и ќе се склопат во мала топка, полесно ја задржуваат телесната топлина.
Поради тоа понекогаш изгледа како да спијат многу повеќе, иако дел од промената е само во тоа што почесто ги гледаме како мирно лежат на топло и удобно место.
Овој дел е поважен од бројот на часови што ги преспива
Наместо постојано да го броите времето што мачката го минува во сон, обрнете внимание на нејзиното целокупно однесување. Ако нормално јаде и пие, ја користи песокот, се грижи за своето крзно, си игра и реагира на работите што вообичаено ѝ го привлекуваат вниманието, дополнителното зимско дремење најчесто не е необично.
Но, ако промената е нагла и е придружена со безволност, губење апетит, повраќање, дијареја, отежнато дишење, промени во движењето, криење или незаинтересираност за околината, не треба автоматски да се припише на студеното време. Во таква ситуација потребен е совет од ветеринар.
Посебно внимание бараат и мачињата, постарите, многу слабите, кратковлакнестите и безвлакнестите мачки, бидејќи можат да бидат почувствителни на ниски температури. На секоја мачка во студените денови треба да ѝ биде достапно топло, суво и безбедно место за одмор.
Затоа, ако вашата мачка со првите студени денови само се преселила од прозорецот под топлото ќебе, а кога ќе стане повторно се однесува вообичаено – најверојатно едноставно си ја прилагодува рутината на зимата.
pexels – macka
