Државите од Западна Африка, Мали, Буркина Фасо и Нигер, објавија за нивното отстранување од Меѓународниот кривичен суд (МКС), изјавувајќи дека веќе не ја прифаќаат неговата јурисдикција.
Овие три нации, управувани од воени диктатури, го обвинија судот дека произволно гони за воени престапи и дека делува како „инструмент на неоколонијалистичка репресија“. Тие потенцираа дека нивната цел останува заштита на човековите права во склад со нивните сопствени вредности.
Сличен аргумент претходно беше употребен за оправдување на нивното повлекување од Економската заедница на западноафриканските држави (ECOWAS).
Организации за човекови права и експерти од ОН ги обвинија вооружените сили на Мали и Буркина Фасо, заедно со сојузничките милиции, за вршење воени злосторства за време на операциите против исламските милиции – покрај злосторствата извршени од самите милитантни групи. Националните власти тврдат дека истрагите се во тек, но досега ниту една не резултираше со јавни заклучоци.
МКС, лоциран во Хаг, од 2002 година процесира најсериозни злосторства како што се геноцид, воени злосторства и злосторства против човештвото. Сите држави членки на ЕУ се дел од судот. Сепак, САД, Израел и Русија не се потписници на Римскиот статут.
И покрај изобилните ресурси како злато и ураниум – кои главно ги експлоатираат европски и северноамерикански компании – Мали, Буркина Фасо и Нигер остануваат меѓу најнеразвиените држави во светот. Сместени во регионот Сахел, на јужниот раб на Сахара, тие се наоѓаат покрај витални рути за шверц и миграција кон Европа.
Во периодот меѓу 2020 и 2023 година, воени лица ја презедоа контролата во сите три поранешни француски колонии, откако избраните влади, поддржани од западните земји, не успеаја да ги потиснат исламските бунтови. Хунтите сè повеќе се дистанцираат од западните партнери и се ориентираат кон Русија за воена соработка, пренесува ДПА. јт/Фото: МИА архива.
Извор: МИА
