Цените на горивата значително се разликуваат од една до друга држава, а најголеми разлики има меѓу земјите што ги субвенционираат горивата и оние каде цената целосно зависи од светските берзански движења и даноците.
Либија е меѓу земјите со најевтино гориво во светот, каде бензинот се продава за само неколку центи за литар. Екстремно ниската цена е резултат на големите државни субвенции и значајните резерви на нафта со кои располага земјата.
Веднаш зад Либија се наоѓаат Иран и Венецуела, каде исто така горивото се продава по исклучително ниски цени. И во овие земји државата има значајна улога во одредувањето на цената, додека домашното производство на нафта овозможува релативно евтино снабдување на пазарот.
Меѓу земјите со најниски цени се и Ангола, Кувајт и Алжир. Станува збор главно за големи производители и извозници на нафта, каде домашните цени се значително пониски во споредба со европските земји.
Од друга страна, во Европа цената на горивото е многу повисока поради комбинацијата од берзанската цена на нафтата, трошоците за преработка и транспорт, како и високите даноци и акцизи.
Разликата е особено впечатлива кога ќе се споредат земјите богати со нафта со државите кои најголем дел од потребите за гориво ги покриваат преку увоз.
Најевтиното гориво, сепак, не значи и најевтин живот. Ниската цена на бензинот во дел од овие држави најчесто е поврзана со државни субвенции, регулирани цени и специфични економски услови, па не може директно да се споредува со животниот стандард или просечните плати во другите земји.
