Трансформацијата на кујна од 1980-тите во модерен простор покажува како боите и креативните решенија можат да го променат домот
Кујната, која со децении била срцето на семејниот дом, денес изгледа речиси непрепознатливо. Некогашниот простор од 1980-тите, со дотрајан линолеум, беж ѕидови без карактер и стар шпорет кој веќе не бил во функција, бил претворен во модерен и топол ентериер кој потсетува на страниците од најубавите магазини за уредување на домот.
Иако просторот имал само околу 16 квадрати, внимателно осмисленото реновирање покажало дека за голема промена не се пресудни ни огромните квадрати ни луксузниот буџет, туку добрата идеја и храброста да му се подари комплетно нова енергија на стариот простор.
Најголемата трансформација се случила уште при самиот влез во кујната. Преку стариот и истрошен линолеум била поставена подна облога, која имитира природен бор, па просторот моментално добил топлина и попријатна атмосфера. Наместо со класични неутрални тонови, ѕидовите биле обоени во нежна валкано розова нијанса, додека таванот добил потемна варијанта на истата боја. Токму тој детаљ ѝ дал длабочина и софистициран изглед на кујната, каков што ретко се гледа во постарите станови.
Посебно внимание привлекле кујнските елементи, кои денес изгледаат модерно и елегантно, но истовремено го задржуваат чувството на домашна атмосфера. Горните плакарчиња со дрвени летви и современи системи за затворање биле најтешкиот дел од реновирањето, но токму тие му дале впечатлив карактер и „вау“ ефект на просторот.
Поврзани објави
Сепак, еден од најефектните детали настанал на многу поедноставен начин одошто би претпоставиле. Работната плоча и ѕидната подлога биле изработени од епоксид, техника која на прв поглед изгледа како луксузен мермер. Комбинацијата на внимателно нанесени нијанси и проѕирен завршен слој создала скапоцен ефект без големи трошоци, па кујната сега изгледа значително полуксузно и поскапо од претходно.
Завршен печат на целиот ентериер му дале модерното осветлување, декоративните дрвени куки, бохо-деталите и многуте билки кои во просторот внеле дополнителна топлина и живост. Некогашната типична кујна од 1980-тите денес изгледа ведро, современо и елегантно, но го задржала она најважното – останала место каде што семејството и понатаму со задоволство се собира.
Оваа трансформација уште еднаш покажува дека и застарениот простор може да добие комплетно нов живот кога ќе се спојат креативноста, внимателно одбраните бои и практичните решенија кои го прават домот поубав, но и пофункционален.
ФОТО: ИНСТАГРАМ
