Што точно се случи во најголемата земја од Западна Африка и зошто беше извршен државен удар?
Демократски избраниот претседател на Нигер, Мохамед Базум, беше сменет од луѓето задолжени за негова заштита – претседателската гарда која чуваше стража пред неговата палата. Претседателот Базум е првиот избран лидер кој наследи претходник избран на ист начин, од прогласувањето на независноста на земјата од Франција во 1960 година. Сега бунтовниците изведоа државен удар, го суспендираа уставот на земјата и го поставија генералот Абдурахман Чиани за шеф на државата.
Нигер е клучен дел од саванскиот екорегион Сахел (или Сахелов Појас), дел што се протега од Атлантскиот Океан до Црвеното Море. Овој дел од Западна Африка е постојано под закана од џихадисти и воени режими. Западните земји се потпираа на Нигер како релативно демократски стабилна земја, за да ги намалат немирите во областа и да го намалат руското влијание.
Географски, Нигер е најголемата земја во Западна Африка. Стратешки, таа е домаќин на француски и американски воени бази и се смета за важен сојузник во борбата против исламистичките бунтовници. Американскиот Стејт департмент го опиша Нигер како столб на стабилноста во Сахел и партнер во борбата против тероризмот, односно групите поврзани со ИСИС и Ал Каеда.
Од економска страна, Нигер е богат со ураниум и произведува околу 7% од вкупните светски резерви. Радиоактивниот метал е толку важен за економијата на Нигер што една од главните улици во главниот град Ниамеј се нарекува „Ураниумска авенија“. Но, Нигерците постојано се на дното на листата кога станува збор за животниот стандард.
Сахел не е стабилен дел од планетата и насилните исламистички групи контролираат делови од територијата меѓу Мали, Нигер и Буркина Фасо. Бунтовничките војници во Нигер кои го соборија претседателот како причина за нивната акција ги наведоа безбедносните грижи.
Во регионот постои мислење дека само со воени интервенции може да се реши проблемот на бунтовниците, поради што постои поддршка за државен удар. Но, нема јасни индикации дека воената хунта ќе се справи со ова прашање подобро од владата. Во соседните земји, слични преврати не дадоа резултати.
Нестабилноста на регионот дополнително е поттикната од климатските промени, бидејќи температурата во Сахел, според експертите, расте побрзо од кое било друго место на планетата. Во тек е таканареченото опустинување, односно претворање на цели области во пустини.
Во Сахел не се активни само џихадистите, туку и руската група Вагнер на Јевгениј Пригожин. На фотографиите по државниот удар и апсењето на претседателот се гледаат луѓе како го веат руското знаме покрај знамето на Нигер.
Пред апсењето, Базум се жалеше на кампањи за дезинформации од страна на Вагнер, кои финансирале дел од нивните активности со искористување на минералните суровини во други африкански земји. Американските власти соопштија дека нема конкретни докази дека Вагнер бил вмешан во државниот удар во Нигер, но дека ситуацијата е „флуктуирачка“ и дека внимателно ја следат. Исто така, постои загриженост за оддалечувањето на Нигер од неговите западни сојузници и приближувањето кон Русија, како што претходно се случи со Мали и Буркина Фасо.
Нигер исто така беше партнер на европските земји во напорите да се запре преминот на мигрантите низ Медитеранот и се согласи да преземе стотици мигранти од Либија. Базум се обиде да го реши и проблемот со трговијата со луѓе меѓу западните и северните африкански земји.
.
