Група предводена од заменик-министерот за економија и труд, Марјан Ристески, престојува во повеќедневна службена мисија во Словенија. Заедно со колеги од различни институции, Ристески ќе одржи работни состаноци со високи словенечки функционери, фокусирани на законската регулатива, институционалните процедури и имплементацијата на правото на Европската Унија во сферата на работните односи, миграцијата и подвижноста на работната сила.
Според информациите од Министерството за економија и труд, целта на оваа студиска мисија е споделување на знаења и искуства, што ќе помогне во унапредувањето на стратегиите и институционалната рамка за прашањата поврзани со трудот и мобилноста на работниците, во согласност со европските стандарди.
“Ќе бидат реализирани средби со високи претставници на Министерството за економија, труд и спорт, Агенцијата за вработување на Словенија, Министерството за внатрешни и јавни работи, како и Канцеларијата за поддршка и интеграција на мигранти. На овие средби ќе бидат презентирани искуствата на Република Словенија во примената на соодветното законодавство на Европската Унија и практичното спроведување на политиките во ова поле”, се наведува од Кабинетот на Ристески.
Студиската мисија е иницирана од Меѓународната организација за миграции (ИОМ), во рамките на проектите „Искористување на потенцијалот на дијаспората за напредување во пристапувањето кон Европската Унија и мобилноста на работната сила во Западен Балкан“ и „Регионалната програма за управување со миграцијата (RMGP) – фокус на Западен Балкан и Република Турција“.
Извор: МИА
