Европската Комисија постигна договор со германската развојна банка KfW за обезбедување гаранции во вредност до 135 милиони евра. Овој аранжман ќе овозможи пристап до финансиски средства преку алтернативни канали за микро, мали и средни претпријатија од Западен Балкан, Источното соседство, Северна Африка, Блискиот Исток и Турција.
Гаранцијата, поткрепена од Европскиот фонд за одржлив развој плус (EFSD+), ќе биде наменета пред сè за оние микро, мали и средни претпријатија кои се соочуваат со најсериозни пречки при добивање финансиска поддршка.
“Ја интензивираме нашата поддршка за стартапите и претприемачите во земјите кандидати, со посебен акцент на компаниите раководени од жени и оние кои се соочуваат со дискриминација, со цел да обезбедиме дека, како што нашата Унија расте, никој нема да биде запоставен”, изјави еврокомесарката за проширување Марта Кос по потпишувањето на договорот.
Еврокомесарката за Медитеранот, Дубравка Шуица, оцени дека ова е одличен механизам за поттикнување на економскиот развој и постигнување на целта за поблиска интеграција на регионот.
“Овој договор адресира едно од клучните ограничувања во обезбедувањето финансии за малите и средни претпријатија, а тоа е барањето за гаранции од банките и микрофинансиските институции за клиенти со кои тие вообичаено не би работеле”, истакна Шуица.
Кристијане Лајбах, членка на Извршниот одбор на KfW Групацијата, изрази задоволство од соработката со Европската Унија за поддршка на оваа иницијатива, која претставува значаен дополнителен ресурс за финансискиот амбиент во засегнатите региони.
“Флексибилниот пристап кон гаранциите им дава можност на алтернативните финансиски институции да споделат дел од ризикот, со што ќе играат поголема улога во подобрувањето на пристапот до капитал за микро, малите и средни претпријатија во соседните региони на ЕУ. Ова ќе ги отстрани бариерите за приватни инвестиции и ќе отвори нови можности за раст”, додаде Лајбах.
Поддршката ќе биде реализирана преку Фондот за унапредување на алтернативното финансирање за претприемачи (SAFE), кој нуди гаранции за алтернативни финансиски посредници, вклучувајќи платформи за групно финансирање, институции за микрофинансирање, компании за лизинг и фондови за ризичен капитал.
“Преку проширување на пристапот до алтернативни извори на финансирање за недоволно опслужените компании, оваа иницијатива има за цел да ја засили иновативноста, инклузивноста и конкурентноста во целиот екосистем на микро, мали и средни претпријатија во погодените региони”, соопшти Европската Комисија.
Европскиот фонд за одржлив развој плус (EFSD+) беше формиран во јуни 2021 година со цел поддршка на јавни и приватни одржливи инвестиции во земјите партнери на ЕУ и претставува клучен инструмент на иницијативата „Глобален портал“ на ЕУ. EFSD+ обезбедува грантови и гаранции за инвестициски проекти преку меѓународни финансиски институции и располага со гарантен капацитет од 39,8 милијарди евра на глобално ниво за периодот 2021-2027 година.
