Денеска, министерот за економија, Бесар Дурмиши, се состана со официјална делегација од Република Азербејџан, предводена од министерот за економија, Микаил Џабаров. Состанокот беше по повод прославата на 30-годишнината од воспоставувањето на дипломатските односи меѓу двете држави, информираа од Министерството за економија и труд.
Министерот Дурмиши ја истакна важноста на оваа средба, изјавувајќи: “Вашата посета денес не е само дипломатски гест, туку симболичен и суштински момент.”
Тој додаде дека оваа годишнина е прилика не само за потсетување, туку и за гледање напред: “Оваа годишнина е повод за сеќавање, но и можност за визија – да ја зацврстиме и продлабочиме нашата економска и стратешка соработка.”
За време на разговорите, беше нагласен обостран интерес за соработка во областите на енергетиката, земјоделството, туризмот, фармацијата, инфраструктурата и инвестициите во малите и средни компании.
Министерот Дурмиши посочи дека овој состанок претставува врска кон јужниот гасен коридор, кон пазарите во Кавказот и кон заедничка, стабилна и економски поврзана перспектива. “Убеден сум дека ова е само почеток на едно ново, посилно партнерство,” заклучи Дурмиши.
свс/вг/Фото: Министерство за економија и труд
