Македонија денеска одбележува 35 години од прогласувањето на независноста, историски датум кој го означи почетокот на самостојниот развој на државата и создавањето на сопствени институции.
На 8 септември 1991 година, граѓаните на референдум се изјаснија за самостојна и независна Македонија. Со огромно мнозинство, граѓаните ја поддржаа определбата државата својот пат да го продолжи како независна и суверена држава.
Овој датум останува еден од најзначајните моменти во современата македонска историја. Референдумот беше проследен со усвојување на уставни и државни акти со кои беа поставени темелите на независната држава.
Три и пол децении подоцна, 8 Септември се одбележува како државен празник, со низа свечености и настани низ земјата. Во фокусот се државноста, слободата, суверенитетот и достигнувањата, но и предизвиците со кои државата се соочувала во изминатите 35 години.
Периодот по независноста донесе големи политички, економски и општествени промени. Македонија изгради сопствени институции, воспостави дипломатски односи со голем број држави и стана членка на меѓународни организации.
Во изминатите децении земјата помина низ бројни предизвици и кризи, но истовремено продолжи да ги развива своите институции и да ја гради својата позиција во меѓународната заедница.
Денот на независноста е и можност за потсетување на генерациите кои учествуваа во создавањето на современата македонска држава, но и на младите кои ја носат одговорноста за нејзината иднина.
По повод 35-годишнината, низ Скопје и другите градови се организираат различни културни и музички настани, а централното внимание е насочено кон свеченото одбележување на празникот.
Осми септември останува симбол на самостојноста и државноста, ден кога граѓаните се потсетуваат на историската одлука со која беше отворен нов период во развојот на државата.
