Хлеб со многу семиња и совршен вкус што можат да го јадат апсолутно сите! Кога ќе го пробате овој хроно-хлеб, секој ден ќе му наоѓате место на вашата трпеза. Освен што има неодолив вкус, многу е здрав. Може да го јадат и оние кои внимаваат на намирниците што ги внесуваат во организмот, но и оние што сакаат да ги симнат вишокот килограми. Се приготвува без бело брашно и квасец, а со денови останува тазе и може долго да стои.
Состојки:
– 2 чаши брашно од спелта
– 1/2 чаша брашно од хелда
– 1/2 чаша брашно од јачмен
– 50 г мелено ленено семе
– 2 чаши кисела вода
– рамно лажиче сол
– кесичка прашок за печиво
– 2 лажици масло
– 30 г сирови семки од тиква
– 30 г сирови семки од сончоглед (опционо)
– 20 г сусам (опционо)
– 10 г ким (опционо)
За мерка можете да користите чаша од 200 мл.
Приготвување:
Во чинија сипете ги сите три вида на брашно, меленото ленено семе, солта и прашокот за печиво, па сето тоа добро промешајте го. Додајте кисела вода и масло и добро измесете го тестото со лажица. Обложете плех со хартија за печење, префрлете ја смесата за хлебот, посипете ја со семиња и печете ја во загреана рерна на 220 степени околу еден час.
По десетина минути печење, задолжително ставете алуминиумска фолија преку хлебот за да не ви загори и оставете го да стои додека сосема се испече. Готовиот хлеб завиткајте го во памучна крпа и оставете го да отстои прекуноќ, така нема да се рони кога ќе го сечете.
