Братот на уапсениот поранешен косовски полицаец Дејан Пантиќ, Синиша Пантиќ, за Косово онлајн изјави дека од првиот ден е на барикадите, но дека не знае ништо за својот брат. Тој додава дека најмногу би сакал брат му да биде ослободен. Ако тоа не се случи бара да биде во домашен притвор. „Кога синоќа слушнав од главниот претставник на ЕУЛЕКС дека не знае каде е и дали примил терапија, не ми беше сеедно.
Најмногу би сакал да ни се дозволи барем еден повик , на мене како брат или на неговото најблиско семејство, сопруга или син, со кого сака да контактира“, вели Синиша Пантиќ.Основниот суд во Приштина му одреди мерка притвор од 30 дена на поранешниот припадник на косовската полиција, Дејан Пантиќ, кој е приведен како осомничен дека минатата недела организирал вооружени напади врз полицијата и канцелариите на изборните комисии во општините со мнозинско српско население во северно Косово.
