Министерката за енергетика, рударство и минерални суровини, Сања Божиновска, зеде учество и се обрати на почетниот настан за проектот PULSE и Мрежата на жени на ЕВН Македонија. Таму, таа цврсто ја поддржа иницијативата насочена кон унапредување на родовата еднаквост и инклузивноста во енергетскиот сектор.
Во својот говор, министерката подвлече дека енергетската трансформација претставува комплексен социјален и економски процес, при што учеството на жените е апсолутно клучно за постигнување успех.
“Енергетиката е ’рбетот на државата, а жените се нејзиниот неискористен интелектуален мотор. Ако исклучиме половина од човечкиот потенцијал, ние веќе сме во енергетски дефицит,” порача Божиновска.
Според информации од Министерството за енергетика, рударство и минерални суровини, таа нагласи дека изградбата на нов систем е невозможна со застарен начин на размислување. Одржливата енергетска промена бара присуство на жени на позиции каде се донесуваат одлуки, управуваат проекти и се распределуваат ресурси.
Министерката потсети дека енергетскиот сектор низ целиот свет минува низ најсуштинската промена во својата историја. Оваа трансформација, која вклучува декарбонизација, дигитализација, интеграција на обновливи извори и паметни мрежи, бара нови вештини, аналитичност, иновативност и флексибилност – токму квалитети каде жените можат и треба да имаат водечка улога.
Како значаен индикатор за напредокот, Божиновска го истакна фактот дека во 2024 година, капацитетот на соларната енергија во земјава за првпат го надмина оној на хидроенергијата. Ова претставува огромен успех за зелената агенда, но истовремено и сериозен инженерски и менаџерски предизвик за дистрибутивната мрежа.
“Модерната енергетика бара лидерство што знае да води промена и култура што знае да задржи талент. Различноста не е прашање на правичност, туку предуслов за прагматични и издржливи решенија,” потенцираше таа.
Министерката се осврна и на постоечките пречки за напредок на жените во овој сектор, посочувајќи дека тие не произлегуваат од недостиг на самодоверба, туку од застарени корпоративни модели и ригидни системи кои не ги препознаваат и вреднуваат нивните лидерски способности.
“На тоа не треба да се гледа како на чин на љубезност кон жените, туку паметна деловна одлука. Тимовите со родова различност носат повеќе иновации, подобра профитабилност и подобро управување со ризици. Ако губиме талент, ние свесно губиме и иднина,” порача Божиновска.
Таа ја поздрави посветеноста на ЕВН Македонија, како потписник на Принципите за зајакнување на жените (WEPs) на Обединетите нации и иницијатор на проектот PULSE. Оценката беше дека оваа програма не е „паралелна приказна“, туку интегрален дел од моторот на трансформацијата на секторот.
“Одржлива енергија бара одговорна компанија, а одговорна компанија бара лидерство што ги отвора вратите за најдобрите. PULSE и Мрежата на жени во ЕВН Македонија се токму тоа – пулсот на новата енергетика,” истакна министерката.
Божиновска им упати порака на младите жени во енергетиката: „не чекајте дозвола за да водите, заземете го своето место. Не ги замолчувајте своите идеи, кажете ги гласно. Посилни сте отколку што мислите“.
Министерството за енергетика, рударство и минерални суровини, како што нагласи таа, останува отворено за соработка со приватниот сектор преку интегрирање на родовата компонента во сите енергетски стратегии и политики.
„Заедно пулсираме напред – ги зајакнуваме жените, го зајакнуваме нашиот сектор и ја предводиме енергетската иднина“, порача министерката Божиновска.
вј/Фото: Министерство за енергетика, рударство и минерални суровини.
Извор: МИА
