Повеќето Руси очекуваат конфликтот во Украина да кулминира во 2026 година, според објавените податоци од рускиот државен центар за истражување на јавното мислење ВЦИОМ. Заменик-директорот Михаил Мамонов истакна дека 70% од 1.600 испитаници во анкетата на ВЦИОМ прогнозираат дека 2026 година ќе биде „попродуктивна“ за Русија во споредба со тековната година. Дополнително, 55% од анкетираните ја поврзуваат оваа позитивна перспектива со можното окончание на актуелните случувања, кои Москва ги дефинира како „специјална воена операција“ во Украина.
„Основната причина за овој оптимизам лежи во евентуалното завршување на „специјалната воена операција“ и исполнувањето на поставените цели, согласно националните интереси утврдени од претседателот (на Русија, Владимир Путин)“, објасни Мамонов.
Оваа анкета се толкува како потенцијален сигнал од Кремљ за тестирање на јавното мислење во врска со можноста за мировен договор, особено во контекст на засилените дипломатски напори за ставање крај на воениот конфликт во Украина.
Мамонов како клучни фактори кои влијаат на изгледите за постигнување мировен договор ги посочи руската воена офанзива во Украина, двоумењето на САД да продолжат со финансирањето на Украина, како и неможноста на Европската Унија целосно да ги надомести САД во финансиска и воена смисла.
По завршувањето на активните борбени дејства, според Мамонов, приоритет ќе бидат реинтеграцијата на ветераните од „специјалните воени операции“ во општеството, како и обновата на украинските региони под руска контрола и на руските погранични области.
Независниот центар Левада, кој беше етикетиран како „странски агент“ за време на конфликтот во Русија, известува дека околу две третини од руските граѓани ја поддржуваат идејата за мировни преговори, што претставува највисок процент од почетокот на војната.
Во меѓувреме, Кремљ потврди дека претседателот Путин бил запознаен со контактите меѓу руски претставници и екипата на американскиот претседател Доналд Трамп, во врска со предлози од САД за евентуален мировен договор за Украина. Русија во моментов ги формулира своите позиции по ова прашање.
Во изминатите недели, Путин јасно ги дефинираше своите услови за постигнување мир: Украина да отстапи околу 5.000 квадратни километри од Донбас кои сè уште се под украинска контрола и формално да се откаже од аспирациите за членство во НАТО.
мс/фото: ЕПА
Извор: МИА
