Познат е проблемот на Android фрагментација, како што се нарекува, кој во главно постои поради огромниот број на различни производители и уреди, но сепак не треба да се исклучи и факторот на „незаинтересирани“ корисници.
Кратко кажано, најновата верзија од Android не е таа која е инсталирана кај мнозинството на Android уреди, а тоа останува случајот дури и по година дена од нејзиното претставување.
Google, кои со години веќе работат со најпознатите производители да ги пуштаат нивните надградби што порано, сега ќе се обидат да го „решат“ и проблемот кој е од страната на корисниците.
Тоа ќе го прават со прикажување на известување преку кое корисниците ќе можат да дознаат нешто повеќе за новините кои се достапни во новата верзија од Android и со тоа да бидат потсетени и мотивирани да ја инсталираат.
Оваа новина е наречена Android Upgrade Invite и покрај тоа што ќе функционира автоматски кај уредите од Google, односно тие кои функционираат со gOTA сервисот, ќе може да се користи и од страна на производителите.
Тие ќе можат да го прилагодат известувањето да ги содржи потребните од нивна страна информации и да им ги пуштаат на корисниците кога е потребно.
Би било добро ова да ги мотивира што поголем дел од корисниците да ги инсталираат најновите верзии од Android кои им се достапни, а таквата ситуација би донела добро на сите корисници.
