Селекторот на македонската репрезентација Кирил Лазаров посочи после новиот убедлив пораз на СП во Полска и Шведска, трет во групата од Аргентина, дека сепак ова е реалноста на селекцијата, иако не очекувал убедливи порази.
Македонија загуби со 26-35 од Аргентина во неверојатно бледо издание без жар.
„Аргентина заслужи да победи. Ова е нашата реалност. Пред ова СП, бевме рангирани последни, они беа пред нас. Во овој момент тие се подобри. Видовме дека оваа Македонија, новиот тим, новите млади играчи, осуммината дебитанти, треба многу повеќе да работат за да напредуваат.
Не очекував победи на ниту еден од трите меча, но не очекував да губиме со двоцифрена разлика на секој натпревар. Играчите не знаеја да играат како што се договоравме. Не сум задоволен, треба многу повеќе работа во иднина“, рече Лазаров.
