Одбојкарската репрезентација на Македонија го претрпе првиот пораз на Европското првенство на кое сме еден од домаќините. По победите над Данците и Црногорците, нашите одбојкари паднаа пред светскиот гигант Полска со убедливи 3-0 (25-12, 25-21, 25-14). Средбата која одново се одигра во одлична атмосфера во СЦ „Борис Трајковски“ беше вистинска ревија. „Спартанците“ уживаа во секој поен против великанот, а на моменти играа и рамноправно.
Во средбата се влезе израмнето, Полјаците беа во предност, а нашиот национален тим бркаше резултат. Првпат освен на стартот дојдовме до егал на 9-9, меѓутоа следеше голем пад во играта. Бргу фаворитот почна да се одлепува, прво врза серија поени и дојде на 14-11, а потоа успеа да врзе и девет во низа за убедливи 23-11. Сетот финишира со конечни 25-12.
На стартот на вториот сет Македонија успеа двапати да води со по поен, но и целосно резултатски да му парира на одбојкарскиот моќник. Иако Полска успеа да се одлепи на 10-5 по серијата од пет поени во низа, со добра игра предноста полека се стопи. Во завршницата дојдовме до целосен егал, па по 19-19, следеа и 20-20 и 21-21. Сепак, тогаш две грешки ги исфрлија нашите одбојкари од колосек и фаворитот со 25-21 го затворија сетот.
Израмнето се влезе и во третиот сегмент, пак двапати имавме минимално водство, но блокот и приемот на ривалот беа енигма за Македонија. Полека гостинот почна да гради предност, а иако еднаш се вративме од минус три до 9-9, следеше серија од 7-0 на ривалот за 16-9. Предноста кон крајот на сетот почна да расте, па фаворитот дојде до победата со двоцифрена разлика (25-14).
.
