Претераното изложување на сонце не е здраво, а еве и зошто! – Убавина и здравје

Кожата секој ден е изложена на УВА и УВБ-зраци, дури и кога времето е облачно, па експертите препорачуваат секојдневно да се користи крем со заштитен фактор. Меѓутоа, при изборот на препарати за сончање, многу е важно да обрнете внимание на типот на кожа, бидејќи не се сите кремови за секого.

Масна кожа – не поднесува масла

На масната кожа најмногу ѝ одговараат кремови за сончање без масло. Оние што содржат масло се претешки за овој тип кожа и можат да ги затнат порите и да предизвикаат акни. Најдобро е да ги одбегнувате кремовите отпорни на потење и оние што содржат пчелин восок. За овој тип кожа, вистинскиот избор се полесните гел-кремови.

Комбинирана кожа – хидратантни лосиони

На овој тип кожа му одговараат воздушести формули што не ја оптоваруваат Т-зоната. Одличен избор се лосиони што содржат млечна киселина и алое вера. Тие ја одржуваат оптималната pH-вредност на кожата и ја хранат. Најдобриот избор се хидратантните лосиони, бидејќи кожата брзо ги впива и не создаваат масен површински слој.

Сува кожа – хранливи кремови без парфеми

Сувата кожа е најчувствителна на сончевите зраци и изискува поинаква нега. Кремовите треба да бидат хранливи, без додадени парфеми и мириси, бидејќи тие можат да ја надразнат и исушат кожата. Помагаат и кремовите со состојки, како што се глицерин, масло од јојоба, екстракт на алое вера, кои имаат смирувачко дејство. На сувата кожа не ѝ одговараат гел-формули, туку за неа подобар избор се лосионите, бидејќи подолго се задржуваат на површината.

Не потпирајте се на кремот од минатото лето

• Кога купувате крем за сончање, одбирајте таков што штити од УВА и УВБ штетни зраци и кои имаат заштитен фактор најмалку 30.
• Не лажете се дека поскапите кремови штитат подобро од евтините.
• Задолжително проверете го рокот на траење. Тоа особено важи ако ви останал крем од минатото лето.
• Нанесете го кремот 15 минути пред да се изложите на сонце и нанесувајте го на секои два часа.

Добро намачкајте ги децата

Кожата на децата е исклучително чувствителна и многу лесно гори на сонце, па за нив секогаш одбирајте средство со висок заштитен фактор.