Истражување спроведено на повеќе од 2.500 мажи покажа дека оние кои внесуваат повеќе протеини од растително потекло имаат повисоки нивоа на слободен тестостерон, додека поголемиот удел на животински протеини е поврзан со пониски вредности на овој хормон.
Дали исхраната богата со месо навистина придонесува за повисоко ниво на тестостерон кај мажите? Ново истражување од Финска ја доведува во прашање оваа широко распространета претпоставка и укажува на можна поврзаност меѓу растителните протеини и повисокото ниво на слободен тестостерон.
Научниците од Универзитетот во Источна Финска анализирале податоци од 2.546 мажи на возраст од 42 до 60 години. Учесниците воделе детални дневници за исхраната во текот на четири дена, по што истражувачите ги споредиле нивните навики во исхраната со хормоналните вредности.
Резултатите покажале дека поголемиот удел на животински протеини во однос на растителните бил поврзан со пониско ниво на вкупен тестостерон. Истовремено, мажите кои внесувале повеќе растителни протеини од извори како мешунки, зеленчук и јаткасти плодови имале повисоки нивоа на слободен тестостерон.
Слободниот тестостерон е делот од хормонот кој циркулира во крвта неврзан за протеини и е достапен за користење од организмот
Поврзани објави
Сепак, научниците предупредуваат дека разликите биле релативно мали, иако статистички значајни. Истражувањето не докажува дека ваквите промени имаат конкретно влијание врз здравјето. Дополнителните статистички анализи покажале и дека самата замена на животинските со растителни протеини не е нужно поврзана со значително зголемување или намалување на нивото на тестостерон.
Причините за забележаните разлики сè уште не се целосно разјаснети. Една од претпоставките е дека животинските протеини можат да влијаат врз воспалителните процеси во организмот, додека растителните извори содржат повеќе влакна и незаситени масни киселини. Сепак, станува збор за можни објаснувања, а не за потврдени механизми. Наодите се интересни и поради тоа што на социјалните мрежи често се промовира исхрана базирана речиси исклучиво на месо како начин за зголемување на тестостеронот, иако за таквите тврдења нема доволно клинички докази.
Истражувачите нагласуваат дека повисокото ниво на тестостерон не значи автоматски и подобро здравје. Најважна е хормоналната рамнотежа, а потребни се дополнителни истражувања за да се утврди како различните извори на протеини влијаат врз неа.
Фото: pexels
