Table of Contents
Актерот кој публиката го памети како доктор Слоун од „Grey’s Anatomy“ првично добил погрешна дијагноза, а кога конечно ја дознал вистината, сфатил дека се соочува со неизлечлива болест. Неговата сопруга Ребека Гејхарт открива дека никој во семејството не очекувал последното одење во болница да биде и последно збогување.
„Знам што значи дијагнозата – дека имам прогресивна дегенеративна болест која постепено ќе ми ги оштети нервните клетки и врските што ми се неопходни за да одам, да ги користам рацете, да зборувам и да дишам“.
Овие потресни зборови ги напишал Ерик Дејн во своите мемоари My Book of Days: A Memoir of Moments, објавени постхумно на 3 ноември. Актерот, кој светската публика го засака како доктор Марк Слоун во серијата „Grey’s Anatomy“, почина на 19 февруари 2026 година, на 53-годишна возраст, по битката со амиотрофичната латерална склероза (АЛС).
Во книгата Дејн не ја крие болката, стравот и неизвесноста низ кои минувал по дознавањето на дијагнозата. Особено потресен е описот на моментот кога конечно ја добил потврдата за болеста – по месеци испитувања, погрешни насоки и надеж дека станува збор за нешто што може да се лекува.
Сè почнало со проблем во десната дланка
Првите симптоми актерот ги забележал кон крајот на 2023 година, кога почувствувал дека нешто не е во ред со десната дланка. Она што на почетокот можеби изгледало како изолиран проблем, набргу го вовело во долга и исцрпувачка потрага по одговор.
Најпрво отидов кај специјалист за дланки, кој ме испрати кај друг специјалист, а тој, пак, ме упати кај невролог“, се присетил Дејн во мемоарите.
Ниту неврологот не можел веднаш да утврди што се случува. Следувале нови лекарски прегледи и низа испитувања, но одговорот сè уште изостанувал.
По извесно време, актерот добил дијагноза мултифокална моторна невропатија – ретко автоимуно заболување кое ги зафаќа моторните нерви и може да предизвика мускулна слабост. Иако оваа дијагноза му донела одредено олеснување, бидејќи постојат можности за лекување, терапијата не го дала очекуваниот резултат.
Конечно бев благодарен што имав одговор. И, уште подобро, третман кој е ефикасен во 90 проценти од случаите. Но, третманот не функционираше. Сè уште не можев да ја движам десната дланка“, напишал актерот.
„Знам дека се соочувам со смртна казна“
Кога лекарите сфатиле дека терапијата не помага, повторно се отворило прашањето за вистинската причина за симптомите. Дејн се вратил кај својот лекар во Лос Анџелес, кој му соопштил дека постои сомнеж за амиотрофична латерална склероза.
Следувале уште месеци испитувања и скенирања. Во потрага по конечен одговор, актерот стапил во контакт и со невролог од Сан Франциско, кој ги повторил претходните тестови.
Тогаш ја добил дијагнозата што ќе му го промени животот.
Буквите АЛС излетаа од устата на докторот и мрачно лебдеа над мене. Знам што значат тие букви. Се подготвив барем за толку.
Знам дека тие букви значат дека имам прогресивна дегенеративна болест која постепено ќе ми ги оштети нервните клетки и врските што ми се потребни за да одам, да ги користам рацете, да зборувам и да дишам.
Знам дека се соочувам со смртна казна. Мојот живот се претвори во хорор-филм“, напишал Дејн.
Амиотрофичната латерална склероза е прогресивно невродегенеративно заболување кое ги оштетува нервните клетки одговорни за контролирање на доброволните мускулни движења. Со напредувањето на болеста, мускулите постепено слабеат, а кај дел од пациентите се засегнуваат и способностите за зборување, голтање и дишење.
Ребека мислела дека повторно ќе се врати дома
Во најтешките моменти од болеста, најголема поддршка на актерот му била сопругата Ребека Гејхарт. Двајцата се венчале во 2004 година, а иако во 2017 година се разделиле, никогаш не го финализирале разводот. По дијагнозата, повторно се зближиле, а Ребека била покрај него во текот на тешката битка.
Во неодамнешно интервју, таа открива дека долго време верувала оти ќе имаат уште многу заеднички моменти. Ерик и претходно бил хоспитализиран, но секојпат успевал да се врати дома.
Многупати претходно одеше во болница и ќе го средеа, па ќе се враќаше дома. И беше добро. Потоа повторно се враќавме на нашата секојдневна рутина, која постепено ја приспособувавме“, раскажала таа.
Затоа, кога актерот последен пат бил примен во болница, ниту Ребека ниту нивните две ќерки не помислувале дека тоа ќе биде нивното последно разделување.
Не знаев дека тоа е тоа, дека таа недела ќе биде нашата последна недела. Не знаеја ни нашите ќерки. Навистина ни требаа неколку дена за да сфатиме што значеше тоа последно одење во болница“, открила Ребека.
Таа раскажува дека три дена по приемот во болница почнале да забележуваат промени. Се сменил тонот на лекарите, а и информациите што ги добивале станувале сè посериозни.
Ерик бил свесен дека нешто се случува. Иако веќе не можел да комуницира вербално, Ребека, нивните ќерки и најблиските пријатели успевале да го разберат.
Последните моменти ги поминал опкружен со најблиските
Кога станало јасно дека крајот е близу, Ребека се потрудила Ерик да има можност да одлучува за околностите во кои ќе ги помине последните моменти.
Се сеќавам на мигот кога Ерик одлучи да направи некои избори. Тој ги контролираше околностите во кои ќе си замине“, раскажала таа.
Ребека и нивните две ќерки биле покрај него. Запалиле свеќи и ја пуштале неговата омилена музика, обидувајќи се да создадат што е можно помирна и попријатна атмосфера.
Ерик Дејн почина на 19 февруари 2026 година, на 53 години. Јавноста претходно дозна за неговата дијагноза во 2025 година, но дури преку постхумните мемоари и сведоштвото на неговата сопруга станува појасно колку тешка била неговата лична битка – и колку неизвесно било последното поглавје од неговиот живот.
Фото: Инстаграм
