Во просториите на Амбасадата на Република Северна Македонија во Хаг беше потпишан договор за поддршка на проектот „Откриј ја Македонија – култура, традиција и природни убавини“. Договорот го потпиша Игор Андреевски со Министерството за надворешни работи и надворешна трговија на Република Северна Македонија.
Проектот има цел да ја претстави Македонија пред пошироката холандска јавност преку промоција на нејзиното богато културно наследство, традициите, природните убавини и туристичките можности, но и преку запознавање со современиот развој на земјата.
Во рамки на иницијативата се предвидува организирање тематски настани во Холандија, преку кои посетителите ќе добијат можност поблиску да се запознаат со македонската култура и особеностите што ја прават земјата препознатлива.
Освен промоцијата на туристичките потенцијали, проектот има и поширока поврзувачка улога. Се очекува да придонесе за зајакнување на односите меѓу македонската дијаспора, холандската јавност и татковината, како и за негување на националниот идентитет и чувството на припадност кај македонските иселеници.
Преку културни содржини и презентација на македонските природни и традиционални вредности, иницијативата треба да помогне во приближувањето на Македонија до холандските граѓани и во создавањето нови можности за културна размена и меѓусебно запознавање.
Проектот „Откриј ја Македонија – култура, традиција и природни убавини“ претставува можност македонското културно наследство и туристичките потенцијали да добијат поголема видливост во Холандија, а врските со македонската заедница во оваа земја дополнително да се зајакнат.
