Незадоволството кај производителите на ајварка од Струмичко не стивнува. И денес тие останаа на блокадите, барајќи повисока откупна цена за пиперката од прва класа, оценувајќи дека понудените цени не ги покриваат ниту основните производствени трошоци.
Земјоделците инсистираат првата класа ајварка да се откупува по 50 денари за килограм, нагласувајќи дека само таква цена може да обезбеди минимална економска исплатливост на производството.
Според нив, во текот на целата сезона биле направени значителни вложувања – од набавка на расад и семенски материјал, преку обработка на почвата, ѓубрење и заштита на насадите, па сè до наводнување и обезбедување работна сила. Поради тоа, велат дека секоја цена под нивното барање би значела работа со загуба.
Производителите очекуваат институциите и откупувачите што поскоро да седнат на заедничка маса и да понудат решение кое ќе биде прифатливо за сите страни. Тие предупредуваат дека неизвесноста околу откупот може сериозно да се одрази врз приходите на земјоделските семејства во струмичкиот регион, каде производството на ајварка претставува една од најважните земјоделски гранки.
Додека не се постигне договор за откупната цена, земјоделците најавуваат дека ќе продолжат со протестните активности и блокадите, со цел, како што велат, да го заштитат својот труд и да обезбедат фер услови за пласман на годинашниот род.
