Денеска во селото Острени, во областа Голо Брдо, се одржа традиционалниот турнир во борење „Голо Брдо 2026“, кој и оваа година собра голем број спортисти, љубители на борењето и гости од повеќе земји од регионот. Настанот беше организиран со поддршка на Албанската федерација за борење и Општина Булќиза, во соработка со Здружението за борење „Голо Брдо“.
Манифестацијата помина во свечена и пријателска атмосфера, збогатена со традиционални македонски песни и ора карактеристични за областа Голо Брдо, што му даде посебен дух на целиот настан. Присутните имаа можност да уживаат не само во спортските натпревари, туку и во богатата културна традиција на Македонците од овој крај.
На турнирот се натпреваруваа борачи во различни возрасни и тежински категории, а учество зедоа спортисти и клубови од Голо Брдо, Албанија, Македонија и Косово. Борбите беа исполнети со голема борбеност, спортски дух и фер-плеј, а публиката со аплауз ги поздравуваше најдобрите настапи.
На собирот присуствуваа голем број Македонци од областа Голо Брдо, кои со своето присуство уште еднаш ја потврдија поврзаноста со традицијата, спортот и културното наследство на својот крај. Турнирот уште еднаш покажа дека спортот претставува мост на пријателство.
Извор : vesnik-ilinden.com
Се одржа традиционалниот куп во борење “Голо Брдо 2026 година”
