Милијардерот Илон Маск се произнесе на социјалните мрежи откако неговото име се откри во новообјавени документи поврзани со осудениот за сексуални злосторства Џефри Епстин, вклучувајќи и електронска комуникација од 2013 година.
Според откриените електронски пораки, Маск во декември 2013 година разменал кореспонденција со Епстин во врска со потенцијална посета на неговиот остров во Карибите. Одделно, друга преписка сведочи дека Епстин во февруари истата година се обидувал да организира средба на ручек со Маск.
Маск на платформата Х потенцираше дека неговата комуникација со Епстин била многу ограничена и дека одбил повеќе покани за посета на неговиот приватен остров, како и за патување со неговиот авион.
Тој нагласи дека е свесен дека дел од споменатата кореспонденција може да биде погрешно сфатена, но истакна дека тоа не му претставува причина за загриженост.
Маск додаде дека бил силен заговорник за објавување на документите кои се однесуваат на Епстин, и истакна дека е клучно да се процесуираат кривично оние кои сториле сериозни престапи, особено во случаите на сексуално злоставување на малолетници.
“Свесен сум дека дел од мојата преписка со Епстин може погрешно да се протолкува.”
“Ниту едно лице не се залагало посилно од мене за објава на документите за Епстин и мило ми е што тоа конечно се случи”, потенцираше Маск на Х.
