Разговор со бизнисменот Владимир Стајиќ, кој три децении гради стабилност, партнерства и модерни енергетски практики во регионот
Господине Стајиќ, 2025 е година на големи промени во енергетскиот сектор. Како ја оценувате деловната клима?
Пазарот е динамичен како никогаш досега. Расте побарувачката за сигурни енергетски извори, а истовремено се забрзува транзицијата кон зелени стандарди.
Овие процеси создаваат силен притисок врз компаниите да обезбедат стабилност, модернизација и усогласеност со европските правила.
Три фактори ја дефинираат денешната клима: технолошката трансформација, стабилноста на снабдувачките линии и новите регулативи. 2026 година ќе биде тест за тоа кои компании можат да бидат и стабилни и логистички конкурентни.
Вашата компанија одбележува 35 години постоење. Како гледате на развојот од 1991 до денес?
Од малопродажна бензинска пумпа во 90-тите, прераснавме во еден од водечките увозници на нафта и деривати. Клучен момент беше 2012 година, кога започнавме со директен увоз. Тоа овозможи раст, силна логистика и регионално присуство. Денес функционираме со современи стандарди, развиена мрежа на партнери и јасна визија за иднината. Нашата цел не е да живееме од постигнатото, туку да продолжиме да инвестираме и да напредуваме.
Денес дигитализацијата и техничката инфраструктура стануваат централни алатки во енергетскиот бизнис. Кои технолошки решенија најмногу ја зголемуваат ефикасноста во работењето на вашата компанија?
Кога зборуваме за технологија, мислиме на многу конкретни системи: софтвер за следење на гориво во реално време, дигитални близнаци за моделирање на логистичките процеси, GPS-контрола на транспортниот возен парк, автоматизирани дозирачки системи и аналитички платформи кои ги обработуваат податоците за потрошувачка и набавки.
Овие решенија го намалуваат ризикот од човечки грешки, ја зајакнуваат безбедноста при транспорт и овозможуваат побрза реакција при промени на пазарот. Тоа е новата основа на ефикасноста, точни информации, брза анализа и автоматизирани процеси.
Поврзани објави
Во 2025 беше усвоен новиот Закон за енергетика, важен чекор кон европските практики. Како го оценувате овој реформски процес?
Ова е една од најзначајните реформи во секторот последната деценија. Од аспект на пазарната транспарентност, конкуренцијата и европската усогласеност, сметам дека Министерството за енергетика рударство и минерални суровини заслужува пофалба за успешно донесување на регулативата.
Со регулирање на трговијата со нафта и деривати преку складишта, се создава фер услови за сите учесници, на пазарот, се зајакнуваат безбедносните стандарди и овозможува пазарот да функционира поефикасно. За нас компании, ова е можност уште повеќе да ги подигнеме своите процеси и да ја зацврстиме довербата кај партнерите.
Кои се вашите приоритети во модернизацијата и регионалната соработка?
Фокусот ни е насочен кон јакнење на логистичкиот капацитет, инвестиции во современи бензински пумпи и проширување на партнерствата со европски и регионални компании. Партнерството со Gulf Oil International останува клучно за нашиот раст. Верувам дека Балканот може да стане многу поконкурентен регион доколку се усогласат стандардите, се развиваат заеднички проекти и ако пазарот функционира транспарентно.
Што е најважно за успешен енергетски бизнис во 2026 и понатаму?
Најважни се четири елементи: стабилност, иновација, силна логистика и квалитетни луѓе. Логистиката е особено значајна во нафтениот бизнис, бидејќи од неа зависат сигурноста на снабдувањето, навремените испораки и континуитетот на работењето.
Технологијата носи ефикасност, регулативата го обезбедува фер пазарот, а луѓето ги градат партнерствата и довербата. Ние континуирано вложуваме во обука и развој на кадарот, затоа што компаниите што ќе ги обединат овие вредности ќе го водат енергетскиот развој во следната декада.
Текст: Економист: Светот во 2026-та
Фото: приватна архива
