Денес, под покровителство на Општина Аеродром, ќе се одржи отворена дискусија со претставници од граѓанскиот сектор. Целта е заедничко утврдување на клучни цели и формулирање на поприфатливи локални политики кои ќе ги опфатат сите граѓани на подрачјето на општината.
Според информацијата објавена од Општина Аеродром, оваа средба е дел од подготовката за нов јавен повик, кој се очекува да биде објавен во почетокот на 2026 година. Активноста е дел од проектот што општината го спроведува заедно со Регионалната програма за локална демократија во Западен Балкан 3 (ReLOaD3). Овој проект е поддржан од Европската Унија и негова имплементација е доверена на Програмата за развој на Обединетите нации (УНДП).
Основната цел на средбата е заедничко дефинирање на приоритетите пред нивното конечно усвојување. Со тоа, се настои да се обезбеди проѕирен и вклучувачки процес за идните проекти, кои ќе имаат позитивно влијание врз развојот на локалната заедница.
Меѓу предложените области од особено значење се справувањето со климатските промени, заштита на животната средина, унапредување на социјалната еднаквост, поголемо учество на младите во процесот на носење одлуки на локално ниво, како и поддршка и промоција на културниот развој и уметноста.
ра/мд/Фото: Општина Аеродром
