Според филипинската крајбрежна стража, пловила на кинеската морнарица и крајбрежната стража се судрија за време на бркотница по филипински патролен брод во Јужното Кинеско Море.
Инцидентот се случи во близина на спорниот Скарборо Шол, додека филипинската крајбрежна стража ги придружуваше бродовите што делеа помош на рибарите во тој предел, изјави портпаролот на филипинската крајбрежна стража, Џеј Тариела, во соопштението.
Скарборо Шол, кој е лоциран на 240 километри западно од филипинскиот брег и 900 километри источно од кинескиот остров Хаинан, е предмет на несогласување меѓу двете држави откако Кина го окупираше во 2012 година.
Видеоматеријал објавен од Манила покажува како брод на кинеската крајбрежна стража и многу поголемо пловило се удираат со силен удар.
Тариела рече дека бродот на кинеската крајбрежна стража се движел со голема брзина кон филипинската крајбрежна стража кога се судрил со бродот на кинеската морнарица.
Портпаролот на кинеската крајбрежна стража, Ган Ју, денеска потврди дека имало судир, но не го наведе конкретно судирот.
Филипинскиот претседател Фердинанд Маркос помладиот денеска изјави дека патролните бродови на неговата земја ќе продолжат да бидат присутни во Јужното Кинеско Море, кое Пекинг го смета за своја територија и низ кое поминува повеќе од 60 проценти од светската поморска трговија. Маркос, исто така, рече дека секоја војна околу Тајван би ги вовлекла Филипините во конфликтот и покрај нивната „силна желба“ да избегнат „секаква конфронтација со некого“.
Пекинг го смета Тајван за своја територија и се закани дека ќе употреби сила доколку е потребно за да ја преземе контролата врз него, додека редовно испраќа воени бродови и авиони во зоната околу Тајван.
мс/фото: Принтскрин „Х“ .
