Собраниската Комисија за транспорт, дигитална трансформација, животна средина и просторно планирање денес, без дебата и едногласно со шест гласа „за“ го одобри Извештајот за реализација на годишната програма за работа и развој на Агенцијата за цивилно воздухопловство за 2024 година.
Претходно, претседавачот на Комисијата ги информираше членовите на Комисијата дека Владата на Република Северна Македонија не доставила став по овој материјал.
Презентерот на Агенцијата за цивилно воздухопловство, Драги Стојаноски, директор на Агенцијата за цивилно воздухопловство, го објасни Извештајот за реализација на годишната програма за работа и развој на Агенцијата за цивилно воздухопловство за 2024 година, заедно со придружните документи приложени кон него.
Според информациите од извештајот, вкупната нето сметководствена вредност на имотот на Агенцијата на крајот на 2024 година изнесува 400.880.923 денари, што претставува покачување од 11,80 проценти во споредба со минатата година.
Ова покачување, согласно извештајот, се должи на порастот на тековните средства за скоро 14 проценти, зголемување на капиталот и резервите за над 17 проценти, како и на мало намалување на обврските за нешто над 5 проценти.
Во текот на 2024 година, Агенцијата постигнала профит пред оданочување во износ од 51.593.010 денари, а профит по оданочување од 46.254.925 денари.
Финансискиот резултат е последица на зголемени приходи за 7,29 проценти и зголемени трошоци за 10,87 проценти во споредба со претходниот период.
Капиталот и резервите на Агенцијата се покачени за 17,13 проценти, а нето паричниот тек од сите дејности во 2024 година изнесува 44.871.282 денари.
Најголем дел од приливот доаѓа од оперативните активности, додека инвестициските и финансиските активности бележат нето одлив.
Индикаторите за работењето укажуваат на висок степен на финансиска стабилност, солвентност и деловна успешност, како и на соодветен пораст на надоместоците за вработените поврзани со нивно стручно доусовршување.
Покрај тоа, споредбата меѓу планираните и реализираните приходи и расходи покажува дека приходите се надминати за 3,31 процент, додека расходите се пониски за 14 проценти од проектираното, што укажува на ефикасно и рационално управување со фондовите.
Решението, заедно со извештајот на Комисијата, ќе биде доставено до Агенцијата за цивилно воздухопловство и Владата на Република Северна Македонија.
