Корсети, предимензионирани ракави, кристални детали и архитектонски силуети се во центарот на новата модна приказна „Ogni cosa al suo posto – Atto II“, во која дизајнерката го спојува ренесансното наследство со современата женственост.
Секоја елеганција не е тивка, ниту секоја женственост е нежна. Понекогаш таа е драматична, самоуверена и моќна – токму како модната приказна што Јована Филиповиќ ја раскажува со својата нова колекција Ogni cosa al suo posto – Atto II.
По првиот дел од колекцијата, во кој доминираа леснотијата и одмереноста, дизајнерката се враќа со поизразена и послоевита естетика. Новите модели се одликуваат со нагласени волумени, остри линии и архитектонски силуети, а секој детаљ е осмислен да ја истакне женственоста без да ја ограничи слободата на движење.
Црната и бојата на слонова коска ја сочинуваат основата на палетата, надополнета со длабоки чоколадни и нежни виолетови нијанси. Корсетите, предимензионираните ракави и флуидните драпирања создаваат впечатлив спој на прецизно конструирани форми и раскошно движење.
Кристалните детали внесуваат доза гламур, додека новиот фирентински монограм JF, извезен тон во тон, претставува суптилен потпис на брендот.
Ренесансата како инспирација за современа женственост
Влијанието на ренесансната облека се препознава во пропорциите, конструкцијата и внимателно избраните детали, но без дословно преземање на историските форми. Филиповиќ ги преточува овие инспирации во современ моден израз, во кој традицијата е присутна како суптилна референца, а не како ограничување.
Зад естетиката, сепак, се крие и лична приказна. Фиренца за дизајнерката е многу повеќе од град во кој ги создава своите кампањи. Тоа е место што ѝ дава чувство на слобода, сила и самодоверба, без да бара ништо за возврат. Токму таа посебна енергија станува емотивната основа на новата колекција.
Поврзани објави
Жената што ја замислува Филиповиќ е сензуална без потреба да го привлекува вниманието и силна без потреба постојано да ја докажува својата моќ. Таа не е ниту кревка ниту потчинета, туку самостојна, слободна и сигурна во сопствениот избор. Нејзината женственост не следи однапред зададени правила – таа сама ги поставува.
Модна приказна во срцето на Фиренца
Кампањата е фотографирана во Фиренца, меѓу другото и во историската галерија Galleria Romanelli. Во амбиентот на скулптурите, историјата и монументалната архитектура, современите модни креации добиваат дополнителна димензија.
Контрастот меѓу историскиот простор и современите силуети ја нагласува основната идеја на колекцијата: минатото може да биде инспирација, но не и правило. Резултатот е модна приказна во која префинетоста се среќава со драматичноста, а класичната естетика добива нова, послободна интерпретација.
Креативната дирекција и фотографијата се дело на Јована Филиповиќ, модел е Ванеса Берти (Vanessa Berti), во соработка со Casting Firenze, а за фризурата и шминката се погрижи Барбара Корсо (Barbara Corso). Асистент на дизајнерката е Марјан Бебекоски.
Кампањата е реализирана со поддршка на VRANJES FIRENZE. Официјален дистрибутер на брендот за Македонија е Contimpex Cosmetic, а производите се достапни во парфимеријата Boudoir – The House of Fragrance.
Со Ogni cosa al suo posto – Atto II, Јована Филиповиќ испраќа јасна модна порака: вистинската елеганција не бара дозвола, а вистинската женственост никогаш не мора да се вклопува во туѓи очекувања.
Текст и фото: ПР
