Над 50 држави остварија комуникација со Белата куќа со цел да отпочнат преговори за трговија, соопшти денес главниот економски советник на американскиот претседател Доналд Трамп, по воведувањето на големи нови давачки кои предизвикаа светски немири.
Во интервју за Еј-Би-Си Њуз, директорот на Националниот економски совет на САД, Кевин Хасет, ги отфрли тврдењата дека тарифите се дел од стратегијата на Трамп, чија цел е колапс на финансиските пазари, за да се изврши притисок врз американската централна банка да ги намали каматните стапки. Тој рече дека нема да има политички притисок врз централната банка.
Во објава на Truth Social во петокот, Трамп сподели видео во кое сугерира дека новите тарифи се насочени кон намерно уривање на берзата во обид да ги принудат банките да ги намалат каматните стапки.
Во одделно интервју за Ен-Би-Си Њуз, американскиот министер за финансии Скот Бесент го минимизираше значењето на падот на берзата, потенцирајќи дека “нема причина” да се предвиди рецесија врз основа на воведените давачки.
Трамп ги вознемири економиите ширум светот откако во средата објави низа тарифи за американскиот увоз, што ја поттикна Кина да возврати и да предизвика стравувања од рецесија и глобална трговска војна. Во утринските ток-шоуа денеска, претставниците на Трамп се обидоа да ги претстават тарифите како паметно репозиционирање на САД во глобалниот трговски систем, а економските нарушувања како краткотрајни последици.
Американските акции паднаа за околу 10 проценти за само два дена откако Трамп објави нов глобален тарифен режим кој беше уште поагресивен отколку што очекуваа аналитичарите и инвеститорите. За тој пад, пазарните аналитичари и големите инвеститори го обвинуваат агресивното промовирање на царините од страна на Трамп, а повеќето економисти и шефот на американската централна банка сметаат дека тоа може да ја стимулира инфлацијата и да му наштети на економскиот раст.
Пазарите погодени од давачките се соочуваат со уште една седмица на потенцијален тарифен хаос, најтешка по најтешката седмица за американските акционери од почетокот на кризата со коронавирус пред пет години.
Хасет изјави дека царините на Трамп досега поттикнале “повеќе од 50” земји да стапат во контакт со Белата куќа за да започнат трговски разговори. За разлика од другите економисти, Хасет рече дека не очекува преголем удар за потрошувачите бидејќи верува дека извозниците ќе ги намалат цените.
Бесент изјави дека не предвидува рецесија поради давачките, наведувајќи го поголемото од очекуваното зголемување на работните места во САД. “Во петокот од податоците за бројот на работни места, кои беа значително над очекувањата, можевме да видиме дека одиме напред, така што не гледам причина да завршиме во рецесија”, заклучи Бесент.
