Foto: Federal Union of European Nationalities
Собранието на делегати на Федералната унија на европските националности (ФУЕН), одржано на 19 септември 2026 година во Хелсинки, усвои вкупно 14 резолуции посветени на заштитата и унапредувањето на правата на националните и јазичните малцинства во Европа.
Меѓу усвоените документи е и резолуцијата „Пристап кон вештачката интелигенција и малцинските јазици базиран на права, праведен, усогласен и инклузивен“. Со неа ФУЕН повикува малцинските и регионалните јазици да бидат посоодветно застапени во развојот на вештачката интелигенција, дигиталните услуги и јазичните технологии.
Од Европската Унија се бара при спроведувањето на Законот за вештачка интелигенција да ги земе предвид јазичните права, како и да обезбеди насочено финансирање за развој на јазични технологии и дигитални ресурси за малцинските и регионалните јазици.
Собранието усвои и резолуција посветена на правата на македонското национално малцинство во Албанија, поднесена од Македонското друштво “Илинден“-Тирана.
Останатите резолуции се однесуваат на различни прашања поврзани со малцинските заедници низ Европа, меѓу кои:
-
заштитата на правата на турското малцинство на Родос и Кос;
-
признавањето на Јенишите како петто национално малцинство во Германија;
-
верската автономија и слободата на вероисповед на турското малцинство во Западна Тракија;
-
заштитата на домородните народи и националните малцинства во Украина;
-
правото на употреба на каталонскиот јазик во здравствената заштита;
-
изборите во Фондацијата на грчко-православната болница „Баликли“ во Истанбул;
-
заштитата на лужичкиот јазик како жив јазик во училиштата во Саксонија и Бранденбург;
-
ревитализацијата на ерменскиот и влашкиот јазик и култура;
-
вклучувањето на регионалните и малцинските јазици во стручното образование;
-
јавното финансирање на бретонските организации во Лоара-Атлантик;
-
спроведувањето образование на малцински јазик во Виена;
-
враќањето на стекнатите права на унгарското малцинство во Подкарпатија и унапредувањето на украинско-унгарскиот дијалог меѓу малцинствата.
Со усвоените резолуции, ФУЕН повикува на конкретни мерки од страна на европските и националните институции за заштита на јазичните, културните, образовните, верските и политичките права на малцинските заедници.
Post Views: 57
