Новоизбраниот претседател на САД, Доналд Трамп, изјави дека Украина би требало да очекува помалку американска помош кога тој ќе ја преземе власта, јави „Си-ен-би-си“. Трамп ова го изјави во денеска емитуваното интервју за американската телевизија „Ен-би-си“, снимено пред саботната средба со украинскиот претседател Володимир Зеленски во Париз.
„Да, веројатно“, одговори следниот американски претседател на Прашањето дали Украина треба да се подготви за намалување на американската помош кога ќе ја преземе должноста на 20 јануари, пред да повтори дека се обидува да ја запре војната.
„Ние плаќаме 350 милијарди долари, а Европа 100 милијарди долари. Зошто Европа не плаќа исто како нас?“, праша Трамп околу поддршката што ја доби Украина од почетокот на војната во февруари 2022 година. Во саботата, Секретарот за одбрана Лојд Остин најави нов пакет за помош вреден 988 милиони долари, со ново оружје и опрема за Украина за помош во тековниот конфликт по руската инвазија. САД ѝ даде на Украина повеќе од 62 милијарди долари во воена помош од почетокот на конфликтот пред речиси три години.
