Белата куќа неочекувано го повлече Џаред Исакман, кандидатот за позицијата директор на НАСА, елиминирајќи го блискиот соработник на Илон Маск од конкуренцијата за челник на вселенската агенција.
Претседателот Доналд Трамп објави дека наскоро ќе го соопшти името на новиот кандидат.
„По темелен преглед на неговите минати врски, ја повлекувам номинацијата на Џаред Исакман за шеф на НАСА“, напиша Трамп на својата мрежа Truth Social. „Наскоро ќе објавам нов кандидат кој ќе биде усогласен со мисијата и ќе ја стави Америка на прво место во вселената.“
Исакман, милијардер и приватен астронаут, избран од Маск да ја предводи НАСА, требаше да има гласање за потврда пред американскиот Сенат следната недела, процес кој долго се одложуваше.
Неговото отстранување од конкуренција изненади многумина во вселенската индустрија. Трамп и Белата куќа не објаснија што ја предизвика одлуката.
„Можеби тоа не е секогаш очигледно во расправиите и турбуленциите, но има многу компетентни, посветени луѓе кои ја сакаат оваа земја и длабоко се грижат за мисијата“, рече Исакман во објава на X. „Ова беше целосно видливо за време на моето (парламентарно) сослушување, каде што лидерите на двете партии јасно ставија до знаење дека се подготвени да се борат за најуспешната вселенска агенција во светот. Неверојатно сум благодарен на претседателот Трамп, на Сенатот и на сите што ме поддржаа“, додаде Исакман.
Повлекувањето на неговата кандидатура дојде неколку дена по официјалното заминување на Маск од Белата куќа, каде што улогата на извршниот директор на SpaceX како „специјален владин службеник“ на чело на Одделот за владина ефикасност создаде проблеми за администрацијата и ги фрустрираше некои од помошниците на Трамп.
„Ретко е да се најде некој толку компетентен и добронамерен“, напиша Маск за Исакман на X, реагирајќи на веста.
Исакман, поранешен извршен директор на фирмата за обработка на плаќања Shift4, имаше широка поддршка од вселенската индустрија, но се соочи со загриженост од пратениците поради неговите врски со Маск и неговиот SpaceX, каде што потроши стотици милиони долари како еден од првите на приватни вселенски летови.
На неговото сослушување за потврда во април, тој се обиде да ја избалансира постојната стратегија на НАСА за истражување на вселената фокусирана на Месечината со притисок да се префрли фокусот на агенцијата на Марс, велејќи дека САД би можеле да планираат патувања до обете дестинации. Како потенцијален лидер на 18,000 вработени во НАСА, Исакман се соочи со тешката задача да ја спроведе одлуката за давање приоритет на Марс, со оглед на тоа што НАСА потроши години и милијарди долари обидувајќи се да ги врати астронаутите на Месечината.
НАСА во петокот објави нови детали за буџетскиот план на администрацијата на Трамп за 2026 година, што предлага намалување на десетици програми за вселенска наука и отпуштање на илјадници вработени, контроверзна реформа што застапниците на вселената и пратениците ја опишаа како катастрофална за агенцијата.
Некои научници веруваат дека промената на номинираните дополнително ја дестабилизира НАСА, бидејќи се соочува со драматични намалувања на буџетот без лидер кој ќе се справи со таквите превирања. сд/ .
Извор: МИА
