Доналд Трамп упати остри критики кон гувернерот на Минесота, Тим Волз, и градоначалникот на Минеаполис, Џејкоб Фри, обвинувајќи ги дека со своите изјави „поттикнуваат бунт“ по фаталниот инцидент во кој федерални агенти за имиграција убија цивил во Минеаполис.
Во објава на социјалните мрежи, Трамп оцени дека локалните власти свесно ја подгреваат јавноста против федералните институции и дека со тоа придонесуваат за ескалација на протестите и нарушување на јавниот ред. Тој истакна дека федералните агенти имаат право да ја спроведуваат законот и ги обвини демократските лидери дека „ја саботираат безбедноста“.
Гувернерот Волз и градоначалникот Фри, од своја страна, побараа целосна и транспарентна истрага за пукањето, нагласувајќи дека присуството на федерални агенти дополнително ги зголемило тензиите во градот. Тие повикаа на смирување на состојбата и почитување на правата на граѓаните.
Инцидентот предизвика протести во Минеаполис и повторно ја отвори дебатата за улогата на федералните сили, употребата на сила и односите меѓу федералната и локалната власт во САД.
