Американскиот претседател Доналд Трамп тврди дека САД се заплеткани во „вооружен конфликт“ со нарко-картелите, додека венецуелската влада вчера го осуди „нелегалниот упад“ на американски воени авиони во воздушниот простор под нејзина контрола.
Пентагон вчера испрати допис до Конгресот во кој посочува дека САД се ангажирани во „вооружен конфликт“ против нарко-картелите, оправдувајќи се откако стручњаците ја доведоа во прашање законитоста на убивањето осомничени дилери со дрога покрај брегот на Венецуела, наместо да ги приведат и да им го конфискуваат имотот.
Вашингтон го обвинува венецуелскиот претседател Николас Мадуро и неговиот кабинет дека водат огромна организација која дистрибуира дрога во САД и објави дека неодамна уништиле четири пловила обележани како „нарко-терористи“, при што загинале најмалку 17 лица. Официјално, се работи за операција против наркотици.
Венецуела „цврсто го отфрла нелегалниот упад“ на воени авиони „75 километри од нашиот брег“, соопштија министерствата за одбрана и надворешни работи во заедничка изјава, без да прецизираат дали станува збор за повреда на нејзината територија. „Овој маневар претставува провокација што го загрозува националниот суверенитет и ги крши нормите на меѓународното право и Чикашката конвенција за меѓународно цивилно воздухопловство“, се нагласува во соопштението.
Пред два дена, министерот за одбрана Владимир Падрино Лопез изјави дека „пет борбени авиони“ „се осмелиле да се приближат до венецуелскиот брег“. Тој ја осуди „провокацијата, но и заканата за нашата национална безбедност“.
САД испратија неколку воени бродови во Карибите и десет воени авиони Ф-35 во Порторико, територија припоена од САД, во она што формално е акција против наркотици. Стејт департментот објави во август дека ја зголемил наградата на 50 милиони долари за апсењето на претседателот Николас Мадуро, кој е обвинет од американскиот правен систем за трговија со дрога и чиј реизбор Вашингтон не го признал.
Правните аналитичари во САД нагласија дека нападите на САД врз пловилата биле надвор од секаква законска рамка. „Како што постојано наведуваме, претседателот дејствуваше во согласност со законите за вооружен конфликт за да ја заштити нашата земја од оние кои сакаат да го донесат овој смртоносен отров на нашите брегови“, рече Ана Кели, заменик-портпаролката на Белата куќа, во писмо до Конгресот.
Меѓутоа, Уставот на САД предвидува дека само Конгресот има моќ да објави војна, што фрла сомнеж врз валидноста на лабаво оправданата декларација за „вооружен конфликт“. Каракас силно ги негира обвинувањата за трговија со дрога и, како одговор на испраќањето бродови и авиони од страна на САД, што го смета за „воена закана“, започна воени вежби и мобилизираше резервисти и милиции.
Венецуелските власти ги сметаат обвиненијата за трговија со дрога како лажен изговор за соборување на Мадуро и запленување на нафтените ресурси на Венецуела. Земјата тврди дека има најголеми резерви на нафта во светот.
мс/фото: ЕПА .
