За подготовка ви се потребни само неколку состојки и околу 10 минути работа. Овие американски погачици се печат директно во стопен путер, благодарение на што добиваат крцкави рабови и мека, воздушеста средина.
Ако сакате домашни печива, но не сакате да губите време на месење тесто, чекање да нарасне и обликување на секое парче посебно, овој рецепт е вистински избор. Станува збор за американските погачици познати како „Butter Swim Biscuits“, кои се подготвуваат на малку поинаков начин – се печат директно во стопен путер.
Тајната на нивниот вкус и текстура е токму во подготовката. Путерот за време на печењето се впива во тестото, создавајќи златно-кафеава и крцкава кора, додека внатрешноста останува мека и воздушеста.
Од наведените состојки ќе добиете девет погачици, а за целата подготовка и печење ќе ви бидат потребни околу 35 минути.
Потребни состојки:
-
300 грама меко брашно
-
12 грама прашок за печиво
-
1 лажичка шеќер
-
половина лажичка сол
-
400 милилитри матеница
-
120 грама путер
Доколку немате матеница, можете да ја замените со мешавина од 300 милилитри обичен течен јогурт и 100 милилитри вода.
Подготовка:
Поврзани објави
Најпрво загрејте ја рерната на 220 степени. Ставете го путерот во квадратен сад за печење, со димензии приближно 20 на 20 сантиметри, и загревајте додека целосно не се стопи.
Во поголем сад измешајте ги брашното, прашокот за печиво, шеќерот и солта. Додајте ја матеницата и кратко промешајте со лажица додека состојките не се соединат во меко и малку лепливо тесто. Нема потреба од месење со раце или дополнително додавање брашно.
Префрлете го тестото во садот со стопениот путер и рамномерно распоредете го до рабовите. Внимавајте да не го вмешате путерот во тестото. Потоа, со нож засечете девет приближно еднакви квадрати, до самото дно на садот.
Печете околу 25 минути, додека површината не добие златно-кафеава боја, а внатрешноста не биде целосно испечена.
По печењето, оставете ги погачиците да отстојат пет до десет минути. Така дел од путерот дополнително ќе се впие, а погачиците полесно ќе се одвојат.
Можете да ги послужите за појадок, со супа или чорба, но и во слатка варијанта со мед или џем.
Фото: pexels
