Ана Костадиновска се прости од своите колеги кои го загубија животот во пожарот во дискотеката во Кочани
Ана Костадиновска, која со години ја делеше сцената со покојната Сара Пројковска и им беше придружен вокал на ДНК, на својот фејсбук-профил се збогува со колегите кои трагично го изгубија животот во катастрофалниот пожар во Кочани.
Покрај Сара Пројковска, меѓу жртвите од бендот беа Андреј Ѓорѓиески, Филип Стевановски, клавијатурист и директор на Центарот за култура „Ацо Шопов“ – Штип, тапанарот Ѓорѓи Георгиев, фотографот Александар Ефремов, тонецот Игор Велков, гитаристот Александар Коларов и бит-боксерот Мартин Атанасовски-Буцо.
Покрај Ана, ужасната несреќа ја преживеа и Владимир Блажев – Панчо, кој моментално е во болница.
На својот фејсбук-профил, Ана напиша:
Поврзани објави
„Си замина дел од моето второ семејство. Заедно со нив и душава моја. Остана само пепел и празнина, а кој би рекол дека празнината може толку силно да БОЛИ.“
Ана сподели и фотографија од неа и Сара Пројковска, во спомен на нејзината добра пријателка и колешка.
„Љубовче мое, даденце мое, ангелу мој, душо на мојата душа. Ќе те сакам додека дишам и постојам, а ќе болиш секој ден…“, напиша таа во описот на фотографијата.
Членовите на бендот ДНК кои починаа во пожарот беа погребани денеска во Скопје и Струмица. Пејачот на бендот Андреј Ѓорѓиески, беше погребан на градските гробишта Бутел, а членката на бендот и професорка на Факултетот за музичка уметност (ФМУ), Сара Пројковска на гробиштата во Лисиче. Погребот на младиот музичар од Струмица, тапанар на бендот, Ѓорѓи Ѓорѓиев беше на градските гробишта во Струмица.
