Премногу силното четкање, погрешната четка и плакнењето на устата веднаш по миењето се само дел од навиките што можат да му наштетат на оралното здравје. Експерт со повеќе од три децении искуство објаснува како правилно да ги негувате забите.
Миењето на забите е дел од секојдневната рутина, но тоа не значи дека сите правилно го правиме. Иако основните правила за орална хигиена се добро познати, многумина несвесно прават грешки што можат да доведат до оштетување на забите и непцата.
За најчестите пропусти зборува професорот Мареј Томсон од Универзитетот во Отаго, кој има повеќе од три децении искуство во образувањето стоматолози и е автор на речиси 500 стручни трудови.
Меката четка е најдобриот избор
Томсон советува користење исклучиво меки четки за заби, а избегнување на средно тврдите и тврдите. Забниот плак е мек биофилм и нема потреба од агресивно триење за да се отстрани.
Напротив, пресилното четкање може да ги оштети непцата и дентинот, особено во пределот на вратот на забот. Според стоматологот, нежните и правилни движења се многу поважни од силата со која ги триете забите.
Миењето треба да има систем
Една од честите грешки е недоволното чистење на одредени делови од устата. Томсон објаснува дека луѓето често послабо ги чистат забите на страната на устата што одговара на нивната доминантна рака.
Тој препорачува систематски пристап: прво да се исчисти внатрешната страна на долните заби, потоа надворешната, а истата постапка да се повтори и кај горните заби.
Правилото за две минути е корисен ориентир, но времетраењето само по себе не гарантира добро исчистени заби.
Кога треба да ја смените четката?
Четката не мора да се менува според однапред одреден календар. Според Томсон, најважно е да се следи состојбата на влакната. Доколку се раширени, деформирани и ја изгубиле формата, време е за нова четка.
Поврзани објави
Тој советува и четката да се остава да се исуши природно, без покривање додека е влажна, бидејќи задржувањето на влагата создава поповолни услови за развој на бактерии.
Не ги мијте забите веднаш по кисела храна
По консумирање кисела храна, како портокали, Томсон препорачува да почекате околу десет минути пред да ги измиете забите. Киселините можат привремено да ја омекнат глеѓта, а веднаш потоа силното четкање потенцијално да го зголеми ризикот од нејзино оштетување.
Флуорот е поважен од пастите за избелување
Стоматологот посебно ја истакнува важноста на флуорот во пастите за заби. Препорачува производи со најмалку 1.000 ppm флуор, кој помага во заштитата од кариес и обновувањето на минералите во забната глеѓ.
Тој е скептичен кон пастите за избелување, како и кон секојдневната употреба на водички за плакнење на устата. Сепак, водичките со хлорхексидин може да имаат посебна намена, на пример по орални хируршки интервенции, но не се препорачуваат за долготрајна употреба без совет од стоматолог.
Двапати дневно е сосема доволно
Според Томсон, правилното миење на забите двапати дневно е доволно за одржување на оралната хигиена. Почестото миење не мора да значи и подобра заштита.
Тој препорачува и редовно чистење на просторот меѓу забите со забен конец или интердентални четкички, бидејќи обичната четка не може ефикасно да ги отстрани наслагите од сите тие места.
Најважниот совет е за пред спиење
Една од најважните препораки на стоматологот е по вечерното миење на забите пастата да се исплука, но устата да не се плакне со вода. На тој начин флуорот останува подолго во контакт со забите и продолжува да ги штити од кариес. Токму затоа, неговиот совет е едноставен: измијте ги забите пред спиење, исплукајте ја вишокот паста и не плакнете со вода.
Фото: pixabay.com
