Министерството за трговија на САД објави дека ја зголемува листата на тарифи за производи од челик и алуминиум, вклучувајќи над 400 категории. Ова проширување опфаќа разновидни производи, како што се турбини на ветер, апарати за домаќинство, тешка опрема, железнички возила, мотори, мотори за пловила, мебел и многу други артикли.
На овие производи ќе се наплаќа тарифа од 50 проценти за содржината на челик и алуминиум, додека остатокот ќе подлежи на регуларната национална даночна стапка.
Според финансиската куќа „Еверкор ИСИ“, мерката вклучува увоз во вредност од преку 200 милијарди долари минатата година и ќе ја покачи ефективната даночна стапка за приближно еден процентен поен. Новата листа, исто така, ги вклучува издувните системи за автомобили, електричен челик за изработка на електрични возила, делови за автобуси и климатизери, како и апарати како што се ладилници, замрзнувачи и машини за сушење.
Група странски производители на автомобили предупредија дека САД немаат доволни домашни капацитети за да ја задоволат побарувачката. Компанијата „Тесла“ безуспешно бараше ослободување од тарифи за челичните производи што се користат во електромоторите и турбините на ветер, наведувајќи дека во земјата не постојат производствени можности за тој тип на челик.
Овие нови давачки стапуваат на сила веднаш и вклучуваат компресори, пумпи, како и метална амбалажа за козметика и производи за лична хигиена. „Оваа акција го проширува опсегот на царините и ја поддржува ревитализацијата на американската челична и алуминиумска индустрија“, изјави заменик-секретарот за трговија Џефри Кеслер.
Производителите на челик претходно испратија молба до администрацијата со барање да се прошират царините и на дополнителни делови за автомобили.
фото: архива
Извор: МИА.
