Македонскиот репрезентативен центарфор Милан Ристовски, братот на капитенот на националниот тим Стефан, посочи дека верува во нов успех на репрезентативата и добар резултат на Македонија во петок против Украина во првиот од двата меча во овој јунски термин од евроквалификациите во „групата на смртта“.
Македонија и Украина последен пат меѓусебе играа на Еуро 2020 во Букурешт кога загубивме со 1-2, а помладиот Ристовски беше дел од националниот тим на историскиот прв настап на големите натпреварувања, но потенцира дека сега ги очекува многу поразличен меч.
„Сите сме мотивирани кога сме во репрезентацијата, имаме одлична атмосфера и сакаме да направиме нов успех. Убеден сум дека заеднички ќе се бориме за тоа. Украина е силна селекција, со фудбалери кои играат во големи клубови, но ние играме дома, очекуваме поддршка од публиката и заедно верувам дека може да дојдеме до позитивен резултат. Со Украина игравме на Еуро 2020, но сега ова ќе биде поинаков меч. Иако, се разбира дека одредени анализи ќе искористиме од тој меѓусебен меч. Во оваа фаза на подготовките сѐ беше базирано на тактички работи, ја враќаме свежината и јас се надевам дека сите ќе одговориме на задачите на селекторот“, рече Ристовски.
Извор: sport1.mk
