Почетокот на проектот за засилување на капацитетите на централните банки во земјите од Западен Балкан беше забележан со видео запис.

Започнувањето на тригодишната Регионална програма, финансирана од ЕУ, со цел да се поддржат централните банки и банкарските супервизорски агенции во земјите на Западен Балкан, кандидатите и потенцијалните кандидати за членство во ЕУ, беше одбележано со специјален билтен и видео, подготвени од Банката на Италија, како домаќин на почетната средба, оддржана во септември 2022 година. Регионалната програма е во вредност од 3 милиони евра, обезбедени преку Инструментот за претпристапна помош (ИПА) и претставува продолжение на слична иницијатива и проектни активности, успешно завршени во 2021 година. Носители на програмата се Дојче Бундесбанк, заедно со 19 национални централни банки на Европскиот систем на централни банки (ЕСЦБ) и Европската централна банка (ЕЦБ). Целта на билатералната соработка и активностите и испорачаните обуки е да се јачаат институционалните капацитети на земјите, особено преку унапредување на нивните аналитички алатки и политики и пренесување на најдобрите меѓународни и европски стандарди во националните практики. Корисници на програмата се Банката на Албанија, Централната банка на Босна и Херцеговина, Агенцијата за банкарство на Федерацијата на Босна и Херцеговина, Агенцијата за банкарство на Република Српска, Централната банка на Република Косово, Централната банка на Црна Гора, Народната банка на Република Северна Македонија и Народната банка на Србија. Видеото со советник-експерт во Народната банка, Даниела Парат Јовановска, истакнува дека првата програма беше успешна и дека втората програма има за цел да ги прошири обуките на уште 6 области на работење.