САД го продолжија дозволата за операции на Нафтената индустрија на Србија (НИС) до 23 јануари. Во меѓувреме, можно е да завршат разговорите меѓу Гаспром и унгарскиот МОЛ за откуп на рускиот мнозински удел во српската компанија.
Министерката за енергетика на Србија, Дубравка Ѓедовиќ Хандановиќ, на својот профил на Инстаграм информираше дека продолжувањето на дозволата значи дека рафинеријата во Панчево, по период од 36 денови, ќе може повторно да започне со работа.
Српскиот претседател Александар Вучиќ денеска ќе даде изјава за РТС, при што ќе ги информира граѓаните подетално за одлуката на Вашингтон и значењето на дозволата за работење на НИС.
Хандановиќ нагласи дека за српската енергетска индустрија е од клучна важност НИС да продолжи со работа во 2026 година. Таа додаде дека секое идно преговарање за продажба на рускиот дел во НИС со потенцијалните купувачи, ќе го има како предуслов работењето на рафинеријата.
Министерката, во својата изјава за медиумите во Србија, потврди дека разговорите ќе продолжат со унгарскиот МОЛ, како еден од можните купувачи.
По добивањето на одобрението од OFAC за дозволата на НИС до 23 јануари 2026 година, ЈАНАФ објави дека се целосно подготвени веднаш да обезбедат непречено доставување и транспорт на нафта до рафинеријата во Панчево.
Владата на Република Хрватска, преку својата објава на мрежата X, информираше дека оваа одлука ќе овозможи континуирано снабдување исклучиво со нафта која не е од руско потекло.
Нафтената индустрија на Србија е под доминантно сопствеништво на Русија.
„Гаспромњефт“ поседува 44,85% од акциите, додека Србија има 29,87%, а „JSC Интелиџенс“ 11,3% (што исто така припаѓа на групацијата „Гаспром“).
