Рускиот претседател Владимир Путин изјави дека договорот за жито во Црното Море, постигнат со посредство на Обединетите нации, кој ѝ овозможи на Украина безбедно да извезува жито преку коридорот на Црното Море, нема да биде обновен додека Западот не ги почитува условите на Москва за сопствениот земјоделски извоз.
За време на состанокот со турскиот претседател Реџеп Таип Ердоган денеска во руското одморалиште Сочи, Путин остана на ставот дека доколку не се укинат ограничувањата за превозот и осигурувањето што ја попречуваат руската трговија со земјоделски производи, Русија нема да го врати договорот.
Русија се повлече од Црноморскиот договор за жито во јули, жалејќи се дека паралелниот договор кој ветуваше отстранување на пречките за рускиот извоз на храна и ѓубрива, не се реализирал.
Сепак, Ердоган рече дека сè уште се надева оти наскоро би можел да дојде до напредок.
.
