Префрлувањето на развојот на Microsoft Edge на основа на Chromium кодот беше вистинската одлука на Microsoft. Edge од до некаде чуден и не до крај компатибилен прелистувач стана одлична апликација како и конкурентите, па корисниците реално веќе немаа причини зошто да не го користат овој прелистувач кој и така доаѓа инсталиран на нивниот Windows компјутер.
Меѓутоа, Microsoft е тука да ги даде овие причини за инаку одличниот Edge. Една од тие причини е карактеристична за компанијата, а тоа е константното натурање на Edge на корисниците преку банери, како и преку отежнување на процесот на избор на друг прелистувач како главен во Windows.
Уште една негативна работа која ја прават од компанијата е непотребно додавање на многу функции, кои повеќето корисници сигурно не ги користат, па дури не ни знаат дека се достапни.
Со наредната верзија од Edge, која моментално е во бета, односно Edge 117, Microsoft најави дека ќе тргне пет од овие непотребни функции. Math Solver, Picture Dictionary, Citations, Grammar Tools и Kids Mode се функциите кои ќе бидат тргнати и верувам дека никој од корисниците нема да бидат засегнати од оваа одлука.
Microsoft Edge е одличен прелистувач, па иако новите верзии имаат поголема популарност од порано, сепак никој не успева да му се приближи на Google Chrome.
