Синдикатите на здравствените работници треба да изготват Предлог-анекс за изменување и дополнување на Колективниот договор за здравствената дејност со корекција на коефициентите за пресметка на платите и да го достават до Министерството за здравство и до Фондот за здравствено осигурување. Ова било договорено на денешната средба меѓу министерот за здравство Фатмир Меџити и претставници на Самостојниот синдикат за здравство, фармација и социјална заштита на РМ и Самостојниот синдикат на клинички центри и други здравствени организации, информираат од Министерството за здравство.

“Исто така беше договорено во тек на овој период, министерот за здравство со Решение повторно да ја активира со работа Комисијата за изготвување пречистен текст на Колективниот договор за здравствената дејност на РМ, која ќе го доработи веќе започнатиот текст, каде меѓу другото ќе бидат усогласени и сите придобивки од потпишаниот Општ колективен договор за јавниот сектор”, известуваат од МЗ.

Оттаму, потенцираат дека министерот уште еднаш ја покажа својата поддршка на синдикатите, а за тоа, како што велат, сведочат и двете покачувања во текот на годинава.“Заедно во соработка со синдикатите придонесуваме за подобри услови на здравствените работници кои се столбот на здравствениот систем. Тие се во фокус на стратешкиот план на министерот за подобрување на здравствениот систем”, истакнуваат од Министерството за здравство.